İranlı müxalif Goldie Ghamari türk əsilli ABŞ-lı jurnalist Cenk Uyguru təhdid edib. Ghamari “Şərəfsiz! Narahat olmayın, İran rejimi sona çatanda sizin də arxanızca gələcəyik” ifadələrini işlədib.

İranlı müxalif siyasətçi Goldie Ghamari qatıldığı canlı yayımda türk əsilli ABŞ-li jurnalist Cenk Uygura qarşı sərt və təhdid xarakterli ifadələr səsləndirib.

Sfera.az xəbər verir ki, Uyguru birbaşa hədəf alan Ghamari ağır təhqirlər edib və “Şərəfsiz! Narahat olmayın, İran rejimi sona çatanda sizin də arxanızca gələcəyik” sözləri ilə diqqət çəkib. Canlı yayımda səsləndirilən bu ifadələr qısa zamanda sosial mediada yayılıb, İran diasporu və beynəlxalq ictimaiyyətdə müzakirələrə səbəb olub.

İRAN REJİMİNƏ QARŞI TANINAN FİQURLARDAN BİRİ

Bu çıxışın İranda etirazların, rejim əleyhinə hərəkatların və müxalifət daxilində fikir ayrılıqlarının getdikcə sərtləşdiyi bir dövrə təsadüf etməsi diqqət çəkir. Ghamari uzun müddətdir İran rejiminə qarşı ən sərt ritorikadan istifadə edən şəxslər sırasında yer alır və müxalifət daxilində bəzi fiqurları da “rejimə dolayı dəstək verməkdə” ittiham edir. Cenk Uygurun xüsusilə Yaxın Şərq, İran və İsrail–Fələstin xətti üzrə şərhlərinin Ghamari və onun kimi şəxslər tərəfindən tez-tez hədəf alındığı bildirilir.

SÖZLƏRİ BÖYÜK MÜBAHİSƏ DOĞURDU

Canlı yayımda işlədilən təhdid dili ifadə azadlığının sərhədləri və siyasi müzakirələrdə zorakılıq çağırışları ehtiva edən ritorika baxımından da tənqid obyektinə çevrilib. Sosial mediada bir çox istifadəçi rejim əleyhdarlığı iddiası ilə edilən bu cür çıxışların müxalifətin legitimliyinə zərər verdiyini müdafiə edərkən, bəzi çevrələr Ghamarinin sözlərini “emosional partlayış” kimi dəyərləndirib.

Cenk Uygur tərəfdən hələlik bu açıqlamalara dair ictimaiyyətə hər hansı cavab verilməyib. Hadisə İran müxalifəti daxilində sərt dil və daxili qarşıdurmalarla bağlı müzakirələri yenidən gündəmə gətirib.

İranlı müxalif canlı yayımda türk əsilli jurnalisti təhdid etdi -VİDEO