Amerika-Azərbaycan Ticarət palatasının (AmCham Azerbaijan) təşkilatçılığı, AccessBank və Neurotime tərəfdaşlığı ilə “Building with AI: From İdea to Working Product” adlı birgünlük innovasiya hakatonu keçiriləcək.

Sfera.az banka istinadən xəbər verir ki, 23 may 2026-cı il tarixində baş tutacaq tədbir iştirakçılara süni intellekt texnologiyalarından istifadə etməklə ideyalarını qısa müddət ərzində real işlək məhsul və prototiplərə çevirmək imkanı yaradacaq. “Building with AI: From Idea to Working Product” iştirakçılar üçün, şəbəkələşmək, yeni əməkdaşlıqlar qurmaq və AI əsaslı inkişafın gələcəyini praktiki şəkildə təcrübədən keçirmək üçün unikal platformadır.

Tədbirə proqram təminatı tərtibatçıları, süni intellekt mühəndisləri, startap komandaları, məhsulyönümlü komandalar, dizaynerlər və texnologiyaya maraq göstərənlər qoşula biləcək. Komandalar ChatGPT, Claude, Cursor, Lovable, Replit, Zapier, API-lər və digər müasir AI platformalarından istifadə edərək innovativ həllər hazırlayacaqlar.

Hakatonda iştirak etmək istəyən şəxslər və komandalar qeydiyyat üçün linkə daxil ola bilər: Building with AI: From İdea to Working Product

Yalnız müsabiqə şərtlərinə uyğun olan iştirakçılarla mobil nömrə və ya imeyl vasitəsilə əlaqə saxlanılacaq.

Hakaton çərçivəsində iştirakçılar bir gün ərzində ideyadan işlək prototipə qədər olan məhsul inkişaf prosesini həyata keçirəcək, günün sonunda isə hazırladıqları həlləri münsiflər heyətinə təqdim edəcəklər. Tədbir yaradıcılıq, sürətli problem həlli, komanda işi və AI vasitəsilə daha çevik məhsul quruculuğu prinsiplərinə fokuslanacaq.

Tədbirin ümumi mükafat fondu 5 000 AZN təşkil edir:

I yer — 2 500 AZN
II yer — 1 500 AZN
III yer — 1 000 AZN

AccessBank müasir texnologiyaların tətbiqini və innovativ təşəbbüsləri daim dəstəkləyərək rəqəmsal transformasiya və texnoloji ekosistemin inkişafına töhfə verir. Bank innovasiya yönümlü layihələrə dəstək göstərməklə gənc mütəxəssislərin, startapların və texnologiya icmasının inkişafını təşviq etməyi prioritet istiqamətlərdən biri hesab edir.

AccessBank, AmCham və Neurotime süni intellekt hakatonu təşkil edir