Amerika Birləşmiş Ştatlarının Prezidenti Donald Tramp Azərbaycana səfir vəzifəsinə namizəd irəli sürüb.

Sfera.az xəbər verir ki, bu barədə Ağ Evin saytında məlumat yayılıb. Bildirilib ki, D.Tramp tərəfindən Virciniya ştatından olan Aleksandr Aldenin Azərbaycan Respublikasına ABŞ-nin fövqəladə və səlahiyyətli səfiri vəzifəsinə namizədliyi irəli sürülüb. Qeyd edək ki, Aleksandr Aldenin təyinatı ABŞ Senatı tərəfindən təsdiqlənməlidir.

Məlumat üçün bildirək ki, Aleksandr Alden 2020-ci ilin dekabrından ABŞ Dövlət Departamentində Münaqişələr və Sabitləşdirmə Əməliyyatları Bürosunda dövlət katibinin köməkçisi vəzifəsini icra edir. Əvvəllər Avropa və Avrasiya Məsələləri Bürosunda dövlət katibi köməkçisinin müavini kimi, o, ABŞ - Aİ münasibətlərinin gücləndirilməsinə və Çinin regional nüfuzuna qarşı mübarizəyə cavabdeh idi. Alden, həmçinin Milli Təhlükəsizlik Şurasında inkişaf etməkdə olan texnologiyalar üzrə baş direktor, eləcə də müdafiə siyasəti və strategiyası üzrə direktor vəzifələrində çalışıb. O cümlədən, o, Müdafiə Naziri Aparatında siyasət üzrə xüsusi köməkçi vəzifəsində xidmət edib.

Dövlət qulluğundan əlavə, Alden "American Affairs"də milli təhlükəsizlik üzrə redaktor, Milli Maraqlar Mərkəzində baş elmi işçi və Dəniz Təhlilləri Mərkəzində layihə direktoru olub. Özəl məsləhət xidmətləri sahəsində o, "Rimland Strategies Group"da idarəedici direktor və "Avascent Group"da təhlil meneceri işləyib. Alden doktorantura tədqiqatları apardığı və beynəlxalq münasibətlər üzrə dərslər tədris etdiyi Cons Hopkins Universitetindən politologiya üzrə magistr dərəcəsi alıb. Onun bakalavr dərəcəsi Cənubi İllinoys Universitetindən politologiya və fəlsəfə üzrədir. Alden italyan, serb, xorvat və Bosniya dillərini də bilir.

Firuzə Əliyeva

Sfera.az

Trampın Azərbaycana səfir göndərmək istədiyi şəxs kimdir?