19:T7f6,

“Beynəlxalq zülmkarlara unudulmaz dərs veriləcək”.

Sfera.az xəbər verir ki, bunu İranın Ali Milli Təhlükəsizlik Şurasının baş katibi Əli Laricani sosial şəbəkə hesabında yazıb.

O, İsrail və ABŞ-ni sərt tənqid edib:

“Sionist cinayətkarların və həyasız amerikalıların hərəkətlərindən təəssüflənirik. Cəsur əsgərlər və böyük İran milləti beynəlxalq zülmkarlara unudulmaz bir dərs verəcək”.

Qeyd edək ki, paylaşım İranın ali rəhbəri Ayətullah Əli Xameneinin öldürülməsi iddiaları fonunda edilib.

Xatırladaq ki, bir neçə gün əvvəl “The New York Times” yazmışdı ki, İranın ali rəhbəri Ayətullah Əli Xamenei ABŞ ilə hərbi münaqişə zamanı sui-qəsd və ölkənin idarəetmə sistemində mümkün pozuntu halında fövqəladə hallar planının hazırlanması barədə göstəriş verib.

Yanvarın əvvəlində İranın etirazları və ABŞ-nin zərbə təhlükəsi ilə üzləşdiyi bir vaxtda Ali Rəhbər ölkəyə rəhbərlik etmək üçün müttəfiqi Əli Laricaniyə müraciət edib. NYT-nin qeyd etdiyi kimi, o vaxtdan İslam İnqilabı Keşikçiləri Korpusunun keçmiş komandanı və Ali Milli Təhlükəsizlik Şurasının rəhbəri 67 yaşlı Laricani faktiki olaraq İranı idarə edir.

Nəşrin yazdığına görə, Xamenei şəxsən təyin etdiyi hərbi komandanlıq və hökumət vəzifələrinin hər biri üçün dörd varislik səviyyəsini müəyyən edən bir sıra direktivlər verib. O, bütün rəhbər vəzifələrdə olanlara dörd nəfərə qədər varis təyin etməyi tapşırdı və onunla əlaqənin kəsilməsi və ya ölümü halında qərar qəbul etmək üçün məsuliyyətləri etibarlı şəxslərin kiçik bir dairəsinə həvalə etdi./qafqazinfo

Laricani sosial şəbəkə hesabında paylaşım etdi