ABŞ-ın Florida ştatı “ChatGPT”-nin yaradıcısı olan “OpenAI” şirkətinə qarşı məhkəmə iddiası qaldırıb. Ştat rəhbərliyi süni intellekt platformasının xüsusilə uşaqlar və yeniyetmələr üçün risklər yaratdığını bildirib. Florida Baş Prokuroru Ceyms Utmeyer şirkəti istifadəçi təhlükəsizliyindən çox mənfəəti ön planda tutmaqda ittiham edib.

Sfera.az xəbər verir ki, məhkəmə sənədlərində “OpenAI”-nin aldadıcı ticarət təcrübələrindən istifadə etdiyi, məhsul təhlükəsizliyinə lazımi diqqət ayırmadığı və qanunları pozduğu iddia olunur. İddiada həmçinin “ChatGPT”-nin zorakı davranışları təşviq edə biləcəyi, intihar meyillərini artırmaq potensialı olduğu, istifadəçiləri alçaldıcı məzmuna məruz qoya biləcəyi, azyaşlılarda asılılıq yarada biləcəyi və tənqidi düşünmə bacarıqlarına mənfi təsir göstərə biləcəyi vurğulanır.

Baş prokuror Utmeyer açıqlamasında bildirib ki, ictimai təhlükəsizlik mənfəətdən üstün olmalıdır və Floridada bu prinsiplərin pozulmasına icazə verilməyəcək. Ekspertlər qeyd edirlər ki, bu məhkəmə prosesi təkcə “OpenAI”-yə deyil bütün süni intellekt sektoruna təsir göstərə biləcək yeni hüquqi və etik müzakirələrin başlanğıcı ola bilər.

Qeyd olunur ki, ABŞ-da süni intellekt platformalarına qarşı hüquqi addımlar yalnız Floridada deyil, digər ştatlarda da diqqəti cəlb edir. Məsələn, Pensilvaniyada “Character.AI” platformasına qarşı iddia qaldırılmış, çatbotun özünü həkim kimi təqdim edərək istifadəçiləri yanlış tibbi məsləhətlərə yönləndirdiyi bildirilib.

Müşahidəçilər hesab edirlər ki, bu iddia texnologiya şirkətlərinin məsuliyyəti, istifadəçi təhlükəsizliyi və süni intellekt sistemlərinə nəzarət məsələlərində daha sərt qaydaların tətbiqinə təkan verəcək.

Mənsumə

Sfera.az

“ChatGPT uşaqlar üçün təhlükə yaradır”