"Uşaqların internet və sosial mediadan sərbəst istifadəsinə məhdudiyyətlər tətbiq olunmalıdır".

Sfera.az xəbər verir ki, bunu Milli Məclisin bu gün keçirilən plenar iclasında millət vəkili Ceyhun Məmmədov çıxışı zamanı deyib.

Deputat bildirib ki, son günlər Bakıda məktəblərdən birində baş verən xoşagəlməz hadisə cəmiyyətdə ciddi narahatlıq doğurub və bu kimi halların kökündə çox zaman ağıllı telefonlar, sosial media və internet resurslarının uşaqlar və yeniyetmələrə mənfi təsiri dayanır.

Onun sözlərinə görə, müasir dövrdə bu təsirlər günbəgün güclənir və artıq bir sıra ölkələrdə uşaqların internetdən sərbəst istifadəsinə məhdudiyyətlərin tətbiqi müzakirə olunur və qərarlar qəbul edilir.

Ceyhun Məmmədov qeyd edib ki, xüsusilə 16 yaşa qədər uşaqlar üçün internetə nəzarətin gücləndirilməsi ilə bağlı layihələr artıq bir sıra ölkələrdə gündəmdədir:

“İspaniyada və bəzi qonşu ölkələrdə bu istiqamətdə qanunvericilik təşəbbüsləri irəli sürülür. Düşünürəm ki, ölkəmizdə də bu sahədə işlərə başlanılmasına ciddi ehtiyac var. Əks halda bu cür halların qarşısını almaq daha da çətinləşəcək”.

Deputat vurğulayıb ki, bu məsələdə təkcə dövlət qurumlarının deyil, həm də məktəblərin və ailələrin üzərinə böyük məsuliyyət düşür. Onun fikrincə, valideynlər övladlarına daha çox vaxt ayırmalı, onlarla daha sıx ünsiyyət qurmalı və tərbiyə işinə xüsusi diqqət yetirməlidirlər.

Ceyhun Məmmədov onu da qeyd edib ki, uşaqların və yeniyetmələrin sağlam inkişafı üçün təhlükəsiz rəqəmsal mühitin formalaşdırılması vacibdir.

Firuzə Əliyeva
Sfera.az

Uşaqların internetdən istifadəsi məhdudlaşdırılmalıdır - Millət vəkili