Münasibətlərdə yeni anlayış: “Shrekking” niyə sürətlə yayılır?

Son zamanlar sosial şəbəkələrdə yeni bir anlayış – “Shrekking” sürətlə yayılmağa başlayıb. Bu anlayış insanların nisbətən daha az cazibədar hesab etdikləri şəxslərlə münasibət qurmaq istəyi ilə bağlıdır. 

Adını məşhur “Shrek” cizgi filmindən alan bu anlayışın mahiyyəti belədir: insanlar inanırlar ki, fiziki baxımdan daha göz önündə olmayan partnyor onlara istədikləri kimi dəyər verəcək və münasibətdə qayğı göstərəcəkdir. Lakin psixoloqlar bildirirlər ki, bu yanaşma hər zaman real həyatda gözlənilən xoşbəxtliyi gətirmir. Əksinə, bəzən insanlar “Shrekked olmaq” adlanan vəziyyətlə üzləşirlər – yəni gözlədikləri qayğını tapa bilməyib məyus olurlar.

 

Bu mövzu ətrafında sosial şəbəkələrdə geniş müzakirələr gedir.

 

İnsanların “Shrekking” kimi yanaşmalara meyillənməsinin səbəbi nədir? Bu, özünəinam problemi ilə bağlıdır, yoxsa münasibətlərdə daha çox təhlükəsizlik və diqqət axtarışı ilə əlaqəlidir?

Mövzu ilə bağlı Sfera.az-a açıqlama verən psixoloq Elgül Ağarzayeva bildirdi ki, şəxslərin belə formada olan münasibətlərə meyl etməsi bir sıra psixoloji səbəblərdən asılı ola bilər.

 

 

Onun sözlərinə görə, bir çox insan münasibətdə sadəcə emosional sabitlik axtarır:

 

“Onlara elə gəlir ki, vizual olaraq daha az cazibədar hesab edilən partnyor, münasibətə daha çox dəyər verəcək və daha çox qayğı göstərərək onların gözləntilərini qarşılayacaq. Bu hal xüsusən uğursuz sevgi münasibətləri olan şəxslərdə olur. Bundan əlavə, bəzi insanların özünə inamı o qədər aşağı olur ki,onlar özləri yaxşı münasıbətə layiq olmayan biri kimi qiymətləndirməyə başlayırlar. Yəni partnyoru daha çox qayğı göstərəcək biri kimi deyil, sadəcə “daha əlçatan” biri kimi görürlər”.

 

Psixoloq qeyd edib ki, burada risk ondadır ki, “shrekking” yanaşması rasional seçimdən çox, qorxular və güvənsizliklər üzərində qurulduqda münasibətlər uzunmüddətli xoşbəxtlik gətirmir:

 

“İnsan “shrekked olmaq” – yəni gözlədiyi diqqəti və qayğını tapa bilməmək riski ilə üzləşir. Əslində münasibətlərdə xoşbəxtlik, tərəflərin xarici görünüşündən daha çox emosional uyum, dəyərlərin ortaq olması və qarşılıqlı hörmətlə bağlıdır. Belə ki,bu meyillər həm özünəinam çatışmazlığından, həm də təhlükəsizlik və sabitlik axtarışından qaynaqlanır. Amma sağlam münasibətin açarı partnyorun necə göründüyü deyil, münasibətdə qarşılıqlı etimad və paylaşımın olub-olmamasıdır”.

 

Firuzə Əliyeva
Sfera.az