Ermənistan Baş naziri Nikol Paşinyanın Qarabağ barədə son bəyanatları ölkədə siyasi gərginliyi yenidən pik həddə çatdırıb.

Sfera.az xarici mediaya istinadən xəbər verir ki, hökumət rəhbəri küçədə onu Qarabağ məsələsinə görə kəskin tənqid edən bir gənclə mübahisə edərək, sözügedən bölgənin heç vaxt Ermənistana aid olmadığını açıq şəkildə etiraf edib.

Küçə mübahisəsi zamanı Paşinyan öz hiddətini belə ifadə edib:

“Səni orada saxlamaqdan ötrü milyardlarla vəsait xərclədik, bəs sən niyə qaçdın?”.

Baş nazir Qarabağın Ermənistana birləşdirilməsi istiqamətində illərdir yürüdülən siyasəti “ölümcül səhv” adlandırıb. Bu fikirlər həm sosial şəbəkələrdə, həm də ölkə ictimaiyyətində geniş əks-səda doğurub.

Bölgənin tarixi və siyasi mənsubiyyətinə toxunan Paşinyan daha sərt ifadələr işlədib. O bildirib ki, uzun illər ərzində əraziyə böyük investisiyalar yönəldilsə də, Qarabağ hüquqi və beynəlxalq müstəvidə heç vaxt Ermənistanın tərkib hissəsi sayılmayıb:

“Biz orada məktəblər, uşaq bağçaları inşa etdik, lakin mahiyyət etibarilə Qarabağ bizim ərazimiz deyildi”.

Həmin vaxt sakinlərdən biri Paşinyanı Qarabağı rəqibə “təslim etməkdə” günahlandırıb, 5000 nəfərin ölümünə görə birbaşa məsuliyyət daşıdığını deyərək onu istefaya çağırıb. Baş nazir isə ittihamları rədd edərək cavabında vurğulayıb:

“Mən heç nəyi təslim etməmişəm. Əgər xalq məni istəmirsə, vəzifəmdən gedərəm, lakin məni xəyanətdə ittiham etməyə son qoyun”.

Siyasi ekspertlərin rəyinə görə, Paşinyanın bu bəyanatları həm Ermənistanın daxili siyasi mühitində, həm də Ermənistan-Azərbaycan diplomatik münasibətlərində yeni müzakirə dalğası yaradacaq.

Qeyd edək ki, Qarabağ problemi uzun illər boyunca iki ölkə arasındakı münaqişənin mərkəzində dayanıb. Yalnız 2023-cü ildə Azərbaycanın həyata keçirdiyi hərbi əməliyyat nəticəsində bölgədə suverenlik tam bərpa olunub.

Mənsumə
Sfera.az

Paşinyanın erməni gənci ilə mübahisəsi: "Qarabağ bizim deyildi" - FOTO