Avropa Mərkəzi Bankı (ECB) və Potsdam İqlim Təsiri Araşdırma İnstitutu iqlim dəyişikliyinin makroiqtisadi təsirlərini öyrənmək məqəsdilə araşdırma aparıb.

Sfera.az xəbər verir ki, araşdırma nəticəsində qlobal istiləşmə ilə inflyasiya arasındakı əlaqə aşkarlanıb.

Araşdırmanın nəticələrini qiymətləndirən Potsdam İqlim Təsirləri Araşdırma İnstitutunun tədqiqatçısı Maksimilian Kotz bildirib ki, keçən il Avropada havaların isti keçməsindən sonra qlobal istiləşmənin inflyasiyaya təsiri iqtisadçıların diqqətini daha çox cəlb etməyə başlayıb.

Kotz söyləyib ki, Avropada 2022-ci ildə havaların həddindən artıq isti keçməsi və quraqlığın baş verməsi kənd təsərrüfatı istehsalında azalmaya səbəb olub ki, bu da ərzaq qiymətlərini artırıb: "Biz son 30 ildə 121 müxtəlif ölkədə iqlim və inflyasiyadakı dəyişiklikləri araşdırdıq və müəyyən etdik ki, iqlim dəyişikliyi inflyasiyanı və xüsusilə ərzaq inflyasiyasını artırıb. Məsələn, keçən il Avropada müşahidə edilın həddindən artıq istilər ərzaq inflyasiyasının artımına 0,7 faiz bəndi təsir edib. Əlbəttə ki, bu səviyyədə olan ərzaq inflyasiyasının hamısı iqlim dəyişikliyi ilə bağlı deyildi. Epidemiya və Ukraynadakı müharibə kimi amillər inflyasiyanın artmasına səbəb olsa da, qlobal istiləşmənin güclənməsi də inflyasiyaya artırıcı təsir göstərir”.

Kotzun fikrincə, qlobal istiləşmə 2035-ci ilə qədər ərzaq qiymətlərinə artırıcı təsir edəcək: “İqlim dəyişikliyinin getdikcə daha da pisləşdiyini görürük. Qlobal istiləşmənin güclənməsinin 2035-ci ilə qədər dünyada ərzaq inflyasiyasını artıracağını proqnozlaşdırırıq. Qlobal istiləşmə 1 ilə 3 faiz arasında ərzaq qiymətlərində artıma səbəb olacaq".

Qlobal istiləşmənin inflyasiya ilə yanaşı məşğulluq və iqtisadi böyümə sürətinə də mənfi təsir edəcəyini dilə gətirən Kotz, iqlim dəyişikliyi səbəbiylə makroiqtisadi artım templərinin və istehsalın tədricən azalacağına dair güclü işarələrin olduğunu bildirib. Elm adamlarının iqlim dəyişikliyinin makroiqtisadiyyat və işçi qüvvəsi üzərindəki təsirlərini araşdırdıqlarını deyən Kotz iqlim dəyişikliyinə görə gələcəkdə daha az iş imkanlarının olacağını vurğulayıb.

Vasif

“Qlobal istiləşmə ərzağı bahalaşdırır” - Avropa Mərkəzi Bankı