“Expressbank” ASC ötən ilin 4-cü rübü üzrə maliyyə hesabatlarını dərc edib. Sənədlər bankın ili mənfəətlə başa vurduğunu göstərsə də, əsas iqtisadi göstəricilərdəki geriləmələr diqqətdən yayınmır. Xüsusilə xalis mənfəətin azalması və kapital itkisi bankın maliyyə dayanıqlığı barədə suallar doğurur.

Sfera.az bildirir ki, 32gun.az bankın açıqladığı rəsmi rəqəmlər əsasında əsas maliyyə göstəricilərini təhlil edib:

Mənfəətdə 4 milyonluq geriləmə

Bankın mənfəət göstəricilərində ciddi eniş müşahidə olunur. 2024-cü ilin sonunda bank 11,2 milyon manat xalis mənfəət əldə etdiyi halda, 2025-ci ilin yekununda bu rəqəm 7,3 milyon manata düşüb. Bu o deməkdir ki, bankın xalis mənfəəti bir il ərzində 35% azalıb.

Kapitalın azalması və ehtiyat ayırmaları

Bankın maliyyə hesabatlarında ən çox diqqət çəkən məqamlardan biri cəmi kapitalın kiçilməsidir. Ötən ilin əvvəlində 138,7 milyon manat olan cəmi kapital, ilin sonunda 126,3 milyon manata enib. Təxminən 12,4 milyon manatlıq bu azalma bankın kapital ehtiyatlarının zəiflədiyini göstərir. Eyni zamanda, mümkün zərərlər üçün ayrılan ehtiyatların 6,3 milyon manatdan 9,5 milyon manata yüksəlməsi, kredit portfelindəki risklərin artmasından xəbər verir.

Əsas maliyyə göstəricilərinin müqayisəsi (Rəsmi rəqəmlər)

Hesabatdakı məlumatlara əsasən, bankın son bir ildəki dəyişimi aşağıdakı kimidir:

Göstəricilər (min manatla)	2024-cü ilin sonu	2025-ci ilin sonu	Fərq (%)
Xalis Mənfəət	11 240	7 312	-35%
Cəmi Kapital	138 729	126 317	-8.9%
Ehtiyat ayırmaları	6 350	9 572	+50.7%
Qeyri-faiz xərcləri	49 140	53 118	+8%

Likvidlik vəziyyəti

Bankın 4-cü rüb üzrə "Gap" (likvidlik boşluğu) hesabatına nəzər saldıqda görünür ki, qısamüddətli öhdəliklərlə aktivlər arasında balans pozulub. Belə ki, bankın 1 gün ərzində qaytarmalı olduğu vəsaitlərin həcmi (122,9 milyon manat), əlindəki dərhal realizə oluna bilən aktivlərdən (61,5 milyon manat) iki dəfə çoxdur. Bu, bankın gündəlik likvidlik idarəetməsində gərginliyin olduğunu göstərir.

Xərclər artır

Bankın gəlirliliyi azaldığı bir vaxtda, inzibati və digər əməliyyat xərclərində artım davam edir. Ötən il 49,1 milyon manat olan qeyri-faiz xərcləri, 2025-ci ildə 53,1 milyon manata çatıb. Gəlir və xərc arasındakı bu disbalans mənfəət marjasını daraldan əsas amillərdən biridir.

“Expressbank”ın 4-cü rüb hesabatı:Mənfəət sürətlə azalır, kapital 12 milyon AZN itirilib