Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Amid Quluzadənin (adı, soyadı şərtidir) cinayət işi üzrə məhkəmə istintaqı yekunlaşıb.

Sfera.az xəbər verir ki, hakim Firuzə Kərimovanın sədrliyi ilə keçirilən prosesdə hökm oxunub.

Məhkəmənin hökmü ilə cinayət təqibinə xitam verilib və o, cinayət məsuliyyətindən azad olunub. Təqsirləndirilən şəxs barəsində qətimkan tədbiri seçilməməsi nəzərə alınıb.

Qeyd edək ki, yekun protokola görə, Amid Quluzadə 12 yanvar 2026-cı il tarixdə saat 15 radələrində ailə üzvləri ilə birlikdə yaşadığı Abşeron rayonu, ərazisində yerləşən fərdi yaşayış evində anası, zərərçəkmiş Təranə Quluzadə (adı, soyadı şərtidir) ilə mübahisə edib.

Materiallarda göstərilir ki, hadisə ananın televizorda təqsirləndirilən şəxsin izləmək istəmədiyi proqramı yüksək səslə izləməsi ilə bağlı irad bildirməsindən sonra başlayıb. Bu səbəbdən tərəflər arasında ailə-məişət münasibətləri zəminində narazılıq yaranıb və mübahisə baş verib.

Bu zaman Amid qadının üzərinə hücum edərək qəsdən əl və yumruq zərbələri ilə onun sifət, qulaq və baş nahiyələrinə ardıcıl zərbələr endirib. Nəticədə Təranə Quluzadəyə sağ alt və üst göz qapaqlarında bir ədəd, sol alt və üst göz qapaqlarında bir ədəd qançır, hər iki gözün ağlı qişasına qansızmalar, eləcə də sol qulaq seyvanında qançır kimi xəsarətlər yetirilib.

Məhkəmə-tibbi ekspertizasının rəyinə əsasən, həmin xəsarətlər sağlamlığın qısa müddətə pozulmasına səbəb olan və qəsdən sağlamlığa yüngül zərərvurmaya aid edilən xəsarətlər kimi qiymətləndirilib.

Məhkəmənin hazırlıq iclasında Amid Quluzadə elan olunmuş ittiham üzrə özünü təqsirli bilib.

O, zərərçəkmiş şəxsə dəymiş maddi ziyanı ödədiyini, anası ilə barışdığını və tərəflər arasında hər hansı narazılığın qalmadığını deyib. Təqsirləndirilən şəxs barəsində olan iş üzrə icraata xitam verilməsini məhkəmədən xahiş edib. (Pravda.az)

Bakıda oğul anasını döydü - TƏFƏRRÜAT