Dünyanın bir çox ölkəsində Yeni il fərqli ənənələr, möhtəşəm atəşfəşanlıqlar və kütləvi şənliklərlə qeyd olunur.

Sfera.az xəbər verir ki, bəzi ölkələr Yeni il gecəsi üçün həm turist axını, həm də təşkil olunan tədbirlərin miqyası baxımından xüsusi seçilir. Birləşmiş Ərəb Əmirliklərinin Dubay şəhəri Yeni il gecəsi dünyanın diqqət mərkəzində olur. Burj Xəlifə ətrafında təşkil edilən iri miqyaslı atəşfəşanlıqlar, işıq şouları və açıq hava tədbirləri Dubayı bu sahədə lider şəhərlərdən birinə çevirir. Şəhərə hər il minlərlə turist məhz Yeni ili burada qarşılamaq üçün üz tutur.

Braziliyanın Rio-de-Janeyro şəhərində, xüsusilə Kopakabana çimərliyində keçirilən Yeni il tədbirləri də ən izdihamlı mərasimlər sırasındadır. Milyonlarla insanın qatıldığı şənliklərdə canlı musiqi, samba ritmləri və gecəyarısı atəşfəşanlıq əsas yer tutur. Avropada Fransa ön plana çıxır. Parisdə Yeni il gecəsi Eyfel qülləsi və Şanzelize prospekti ətrafında keçirilən tədbirlər romantik və mədəni ab-havası ilə seçilir. Şəhər həm yerli sakinlər, həm də turistlər üçün cəlbedici bayram mühiti yaradır.

Şotlandiyanın Edinburq şəhərində təşkil olunan “Hogmanay” festivalı isə Yeni ilin ən qədim və ənənəvi qarşılanma mərasimlərindən biri hesab olunur. Bir neçə gün davam edən festival çərçivəsində konsertlər, küçə şənlikləri və kütləvi atəşfəşanlıqlar keçirilir. Asiya ölkələri arasında Yaponiya fərqli yanaşması ilə diqqət çəkir. Tokioda Yeni il həm müasir şənliklərlə, həm də ənənəvi məbəd ziyarətləri ilə qeyd olunur. Bu, şəhərə gələnlərə həm səs-küylü bayram, həm də sakit mənəvi atmosfer təklif edir.

Qeyd edək ki, yeni ili qeyd etmək üçün ölkə seçimi insanların gözləntilərindən asılıdır. Bəziləri böyük və gur şənliklərə üstünlük verdiyi halda, digərləri daha sakit və mədəni mühit axtarır. Hər iki halda, Dubay, Rio, Paris, Edinburq və Tokio Yeni il gecəsini unudulmaz etmək üçün ən çox seçilən istiqamətlər sırasında qalır.

Niyaz Hacıyev

Sfera.az

Yeni il bu ölkələrdə MARAQLIDIR