Əksər hallarda bayram günlərində hazırlanan yemək və şirniyyatları bir neçə gün istehlak edirik. Bu isə bəzən zəhərlənmə və bu kimi digər mənfi hallarla nəticələnir.

Maraqlıdır, bayram günlərində hansı yeməkləri bir neçə gün saxlamaq və daha sonra istehlak etmək olar? 

Məsələ ilə bağlı Sfera.az-a danışan qida məsələləri üzrə ekspert Ağa Salamov bayram günlərində qonaq sayına uyğun yeməyin hazırlanmasının daha uyğun olduğunu deyib:

"Bayramlarda hər kəsin qida rasionunu bilərək salat və yeməklər hazırlamaq lazımdır. Yəni saya uyğun olaraq qida məhsulları hazırlanmalıdır. Qaymaqdan, kremsiz və yumurtadan hazırlanmayan şirniyyatların ömrü uzun olur. 

Mayonezdən hazırlanan məhsullar, toyuq, balıq və ət məhsullarının yeyilməzdən yarım saat əvvəl süfrəyə qoyulması lazımdır. İsti yeməklər isə adından da göründüyü kimi isti şəkildə təqdim olunmalıdır. Yəni hazırlanmış yeməklər saatlarla otaq temperaturunda stolun üzərində saxlanılıb istehlak olunmamalıdır". 

Ekspert bəzi qida məhsullarının süfrədə iki saatdan çox saxlamamalı olduğumuzu deyib:

"Süfrədə iki saatdan çox qalan məhsulları isə sabaha saxlayıb yemək olmaz. Bu hal istisana olmaqla isə qidaları paslanmayan qabda, yaxud şüşə qablarda və s. növbəti gün üçün saxlamaq olar. Həmin məhsullar yaxşı olardı ki, 48 saata istehlak edilsin, lakin bu müddət 72 saat da ola bilər. Amma nəzərə alsaq ki, soyuducu gün ərzində dəfələrlər açılıb-örtülür, o zaman bu müddəti 48 saat tutmaq lazımdır". 

Əzizə Zeynal