Parisin mərkəzində atışma oldu - Ölənlər var/FOTO

Parisdə kürd mədəniyyət mərkəzinin yaxınlığında naməlum şəxs atəş açıb.

Polis artıq cinayət törətməkdə şübhəli bilinən yaşlı kişini həbs edib. Lakin onun ətrafdakıları hansı səbəbdən öldürdüyü və yaraladığı hələlik məlum deyil.

Sfera.az bildirir ki, bu gün-dekabrın 23-də Fransanın paytaxtında naməlum şəxs insanları öldürmək məqsədilə atəş açıb. 

Atışma Enghien küçəsindəki kürd mədəniyyət mərkəzinin yaxınlığında baş verib. Bu səmtdə əsasən kiçik mağazalar və kafelər var.

Hadisə şahidlərinin bildirdiyinə görə, yaşlı kişi səssizcə yoldan keçənlərə odlu silahla 7-8 dəfə atəş açıb. Hadisə yerinə dərhal silahlı polis bölmələri və təcili yardım maşınları gəlib.

Polisin ilkin məlumatına görə, iki nəfər ölüb, dörd nəfər yaralanıb.

Paris Şəhər Prokurorluğu da atışmada iki nəfərin öldüyünü təsdiqləyib.

Prokurorluq nümayəndələri onu da əlavə ediblər ki, hadisə ilə bağlı 69 yaşlı kişi saxlanılıb. O, artıq həbs edilib. Qətl, qəsdən adam öldürmə və şiddətli zorakılıq faktları ilə bağlı istintaq başladılıb.

Xatırladaq ki, 2021-ci ilin aprelində də naməlum şəxs Parisin mərkəzində atəş açmışdı. Hadisə zamanı bir nəfər ölüb.

Xanım