Hər yerdən atəş səsləri eşidilir, tanklar küçələrdədir: Liviyada vətəndaş müharibəsi başlayıb

Liviyanın Misrata şəhəri ilə paytaxt Tripoli arasında vətəndaş müharibəsi başlayıb: paytaxtda güclü atışma səsləri eşidilir, küçələrdə isə hərbi texnika görünüb.


Sfera.az xəbər verir ki, vətəndaş müharibəsinin başlamasına səbəb Liviya milislərinin lideri Əbdül Qani əl-Kiklinin (Geniva) öldürülməsi olub.
 

Dünya KİV Liviyada vəziyyətin gərginləşməsi barədə məlumat yayıb.
 

Şəhər küçələrində hərbi texnikanın, silahlı insanların, səmada parıldamaların və atışmaların əks olunduğu görüntülər də internetdə yayılıb.

Məlumata görə, gərginlik artdıqdan sonra hərbi texnika, o cümlədən tanklar Liviya paytaxtının küçələrinə çıxarılıb. Tripolidə atışma və təhlükəli vəziyyətə görə insanlar evdə qalmağa çağırılıb.
 

Tripolidə yerləşən yerli Mitiqa hava limanı fəaliyyətini dayandırıb. Uçuşlar Misrataya yönləndirilib. Mülki təyyarələr də üsyançılar arasında toqquşma təhlükəsi səbəbindən Mitiqa hava limanından təxliyə edilib.


Hazırda vətəndaş müharibəsinin başlanmasının nəticələri barədə məlumat yoxdur.
 

Qeyd edək ki, Liviyada mütəmadi olaraq vətəndaş müharibələri baş verir: Ölkədə ilk vətəndaş müharibəsi 2011-ci ildə elan edilib, o zaman ölkəni 1969-cu ildən idarə edən polkovnik Müəmmər Qəddafiyə sadiq qüvvələrlə üsyançı qruplar arasında toqquşmalar baş verib.
 

2014-2020-ci illər ərzində Liviyada İkinci Vətəndaş Müharibəsi başlayıb və bu, müxtəlif silahlı qruplar arasında çoxtərəfli hərbi münaqişəyə çevrilib.

Aynil