Türkmənistanda istehsal edilən qazın Azərbaycandan keçməklə Avropaya ixrac edilməsi planlaşdırılır.

Sfera.az “Bloomberg”ə istinadən xəbər verir ki, Prezident Rəcəb Tayyib Ərdoğan gələn həftə Türkmənistan və Azərbaycan liderləri ilə türkmən qazının Türkiyə vasitəsilə Avropaya nəqli ideyasını müzakirə edəcək.

Məlumata görə türkmən qazının Xəzər dənizi ilə Azərbaycana, buradan Gürcüstana, sonra isə TANAP vasitəsilə Türkiyə üzərindən Avropaya nəqli ideyası irəli sürülüb.

Təklif olunan plan üzrə qazın təhvilinin nə vaxt həyata keçiriləcəyi və ya planın qısa müddətdə texniki cəhətdən mümkün olub-olmayacağı bəlli deyil.

Qeyd edək ki, indiyə qədər türkmən qazının Rusiyadan kənar marşrutlarla nəqli planları müzakirə edilsə də onları həyata keçirmək mümkün olmayıb. Lakin Ukraynanın işğalı və işğalın enerji bazarlarına mənfi təsiri əvvəllər mümkün olmayan müxtəlif enerji marşrutu ideyalarının canlanmasına şərait yaradır. Hazırda Türkiyə regionun qaz mərkəzinə çevrilməyə çalışır. Bu məqsədlə TANAP-ın ötürücülük qabiliyyətinin iki dəfə artırılaraq 32 milyard kubmetrə çatdırılması qərara alınıb.

Hazırda Avropada Türkmənistan qazına böyük ehtiyac var. Çünki Rusiya Avropa İttifaqına təbii qaz tədarükünü demək olar ki, kəsib və bu enerji qiymətlərində sıçrayışa səbəb olub. Belə bir vəziyyətdə Avropanın Azərbaycan və Türkmənistan qazına ehtiyacı xeyli artıb. Azərbaycandan fərqli olaraq Türkmənistan öz qazını Avropaya göndərə bilmir. Əgər Xəzər dənizi vasitəsilə nəqlin təmin edilməsi mümkün olarsa, Türkmənistan da böyük həcmdə qazını Azvropaya sata biləcək.

Vasif

Sfera.az