“Bu, universitet tələbələrinin ruh halının göstəricisidir” – Turan İbrahimov
İqtisad Universitetində tələbələrin “Tiktoker”lərlə görüş keçirməsi sosial mediada səs-küy yaradıb. Bununla bağlı fikirlər isə birmənalı deyil.
Sfera.az-ın məlumatına görə, mövzu ilə bağlı tanınmış aparıcı Turan İbrahimov deyib ki, dövrün qəhrəmanları “tik-tokçular”, meyxanaçılardır:
“Reallığı danmaq, aşağılamaq ağıllı hərəkət deyil. Əgər o insanlar bu gün kütləyə təsir edə və yaxşıca pul qazana bilirlərsə, deməli, orta statistik insanlardan üstündürlər. Hər birinin də özünəməxsus uğur hekayəsi var, çoxları üçün nümunədilər. Bəli, qəribə görünən onların universitet tələbələrinin önünə çıxmalarıdır. Mədəniyyət və İncəsənət Universitetinin də yox, məhz İqtisad Universitetinin... Bu isə tipik Azərbaycan reallığıdır, ölkədə universitet tələbələrinin ruh halının göstəricisidir”.
T.İbrahimov qeyd edib ki, oradakı şəxslərin əksəriyyəti sadəcə tələbə olmaq üçün o universitetdədir:
“Böyük əksəriyyətinin də gələcəkdə öz ixtisası üzrə iş tapa biləcəyinə qətiyyən inamı yoxdur. Ona görə də məlum “tik-tokçu”ların sadə yolla məşhurlaşması, pul-hörmət qazanması onlara başgicəlləndirici uğur kimi görünür. Haqsız da deyillər”.
Türkan