“Bank Avrasiya” ASC 2026-cı ilin ilk rübünü (yanvar-mart) 937 min manat xalis zərər ilə başa vurub.

Sfera.az xəbər verir ki, bank 2025-ci ilin ilk rübünü 1 milyon 977 min manat xalis mənfəət ilə bağlamışdı.

Beləliklə, “Bank Avrasiya”cari ilin ilk rübündə mənfəətdən zərərə keçib.

Xatırladaq ki, “Bank Avrasiya” 2025-ci ildə 5 milyon 81 min manat xalis mənfəət əldə etmişdi.

Bankın əməliyyat mənfəəti 2025-ci ilin ilk rübündə 1 milyon 389 min manat ikən, 2026-cı ilin ilk rübündə 1 milyon 232 min manat manata düşüb.

2026-cı ilin yanvar-mart dövründə “Bank Avrasiya”nın cəmi əməliyyat gəlirləri (faiz və qeyri-faiz gəlirləri (faiz borcları üzrə yaradılmış məqsədli ehtiyatlar nəzərə alınmaqla)) 4 milyon 793 min manat, cəmi əməliyyat xərcləri (faiz və qeyri-faiz xərcləri) 3 milyon 561 min manat, əməliyyat mənfəəti 1 milyon 232 min manat təşkil edib. Bank əməliyyat mənfəətindən mümkün zərərlər üçün yaradılan məqsədli ehtiyatlara 2 milyon 249 min manat ayırdığından ilk rübü 1 milyon 17 min manat zərər ilə başa vururb. Gözlənilməz fəaliyyət növlərindən gəlir ilə əlaqədar olaraq zərər 937 min manata düşüb. Xatırladaq ki, 2025-ci ilin ilk rübüdə mümkün zərərlər üçün yaradılan məqsədli ehtiyatlardan azad olan 342 min manat mənfəətə əlavə edilmişdi.

“Bank Avrasiya”da mümkün zərərlər üçün yaradılan məqsədli ehtiyatlara ayırmanın yaranması gecikən kreditlərin artdığına işarədir.

Bank kiçilib

2026-cı ilin 1-ci rübündə “Bank Avrasiya”nın cəmi aktivləri 562 min manat və ya 0,3% azalaraq 2025-ci ilin sonundakı 214 milyon 510 min manatdan 213 milyon 948 min manata, o cümlədən kredit portfeli (müştərilərə verilmiş kreditlər) 4 milyon 261 min manat və ya 3,1% azalaraq 132 milyon 878 min manata geriləyib.

Kapitalı "əriyib"

31 Mart 2026-cı il tarixində “Bank Avrasiya” 87 milyon 542 min manat məcmu kapitala malik olub. Bank 2025-ci ilin sonunda 88 milyon 471 min manat məcmu kapitala malik idi (929 min manat azalıb). /marja.az

“Bank Avrasiya” zərərlə işləyir, bank kiçilib