Putin Kim Çen İnə məktub göndərdi – Ondan nə istəyir?
Rusiya prezidenti Vladimir Putin Şimali Koreya lideri Kim Çen İnə məktub göndərib.
Sfera.az-ın məlumatına görə, Vladimir Putin Moskva ilə Pxenyan arasında münasibətləri genişləndirmək istədiyini ifadə edib.
Rusiya lideri məktubunda ikitərəfli münasibətlərin yaxşılaşdırılmasının Koreya və Şimal-Şərqi Asiyada təhlükəsizliyin və sabitliyin artırılmasına kömək edəcəyini qeyd edib.
Şimali Koreya mediasının məlumatına görə, Kim Çen In də cavabında Rusiya ilə Şimali Koreya arasında əməkdaşlığın artmağa davam edəcəyini bildirib. Məlumata görə, Kimin Putinə cavab olaraq göndərdiyi məktubda Rusiya-Şimali Koreya əlaqələrinin İkinci Dünya Müharibəsinin sonunda Yaponiyanın məğlubiyyəti ilə qurulduğu xatırladılıb:
“O vaxtdan bəri iki ölkə arasında bu strateji və taktiki əməkdaşlıq, dəstək və həmrəylik düşmən hərbi qüvvələrinin təhdid və təxribatlarının qarşısını alacaq yeni səviyyəyə yüksəlib”.
Məktubda "düşmən qüvvələri" deyəndə hansı ölkənin nəzərdə tutulduğu bildirilməsə də, Şimali Koreyada bu terminin çox vaxt ABŞ və onun müttəfiqlərinə istinad etmək üçün istifadə olunur. Mütəxəssislər Rusiyanın Ukraynaya təcavüzü başlayan fevral ayından bu yana iki ölkənin getdikcə daha da yaxınlaşdığını vurğulayıblar.
Qeyd edək ki, məktub avqustun 15-də qeyd olunan “Koreya Qurtuluş Günü” üçün göndərilib.
Günay Rəsulqızı