"Qarabağ"ı tənqid edənlər, üç klubumuzun məğlubiyyətinə susur... – ŞƏRH
“Dünən 3 oyunda 9 qol buraxan 3 Azərbaycan klubları “Neftçi”, “Zirə” və “Qəbələ”yə bu mövsüm üçün ümumilikdə 20 milyondan çox pul ayrılıb”.
Sfera.az xəbər verir ki, bu sözləri idman jurnalisti Aydın Bağırov dünən UEFA Konfrans Liqasının II təsnifat mərhələsi çərçivəsində komandalarımız "Nefçi", "Qəbələ" və "Zirə"nin rəqibləri qarşısında məğlub olmasını şərh edərkən deyib.
Onun sözlərinə görə, ayrılan 20 milyon vəsaitin böyük hissəsi təxminən 14-15 milyon manatı “Neftçi”nin payına düşür:
“Bu 20 milyonun qarşılığında başda “Neftçi” olmaqla 3 klubumuz avrokubokda cəmi 1 qol vurub və təbii ki, 3-ü də uduzub. İndi adını nə qoyaq bu klubların? Mən onsuz da bilirəm”.
A. Bağırov Qarabağa ünvanlanan tənqidlər barəsində də danışıb:
“Yazıq “Qarabağ” 2 oyuna 8 qol vur, İsveçrə kimi TOP-15-də olan ölkənin çempionuna ilk oyunda qalib gəl, onu da mühakimə eləsinlər ki, niyə 1 qol fərqlə udmusan. Halbuki “Sürix” “Lex”dən güclü idi, “Qarabağ” isə daha hazırlıqlı. Komanda oyun baxımından da “Lex”lə oyunlardan üstün idi.
ÇL-də 3 oyuna 8 qol bir Azərbaycan klubu üçün əla göstəricidir. Həm də komandanın cəsarətli, əsl hücum futbolu oynamasının təsdiqi.
Əsas heyət sadəcə mükəmməl idi. Medina, Kadi, Vadji, Ozobiç, Şahruddin, Elvin, “qoca” Almeyda.
Bu komanda Sürixdə bugünkündən də hazır vəziyyətdə olacaq və ən pis halda heç-heçə edib mərhələ adlayacaq”.
Qeyd edək ki, UEFA Konfrans Liqasının II təsnifat mərhələsinin ilk oyununda Macarıstanın "Fehervar" klubu ilə qarşılaşan "Qəbələ" 4-1, Kiprin "Aris" klubu ilə qarşılaşan "Neftçi" 2-0, İsrailin “Makkabi” klubu ilə qarşılaşan “Zirə” isə 3-0 hesabı ilə məğlub olub.
Turan Rzayev