Günəşdə müşahidə olunan iri və aktiv bir bölgə yaxın günlərdə Yerə doğru istiqamətlənəcək. Alimlərin bildirdiyinə görə, bu bölgədə son günlər ərzində çox güclü partlayışlar qeydə alınıb, lakin hazırda Yer üçün hər hansı təhlükə istisna olunur.

Sfera.az xəbər verir ki, Rusiya Elmlər Akademiyasının Kosmik Tədqiqatlar İnstitutunun Günəş Astronomiya Laboratoriyasından verilən məlumata görə, Günəşin uzaq tərəfində yerləşən aktiv mərkəzdə dörd gün ərzində ən azı iki çox güclü alovlanma baş verib.

Alimlər bu alovlanmaların ən yüksək səviyyə hesab olunan "X" sinfinə aid ola biləcəyini bildirirlər. Hazırda həmin bölgə Günəş diskinin kənarında yerləşdiyindən onun real gücünü tam ölçmək mümkün deyil.

Qeyd olunur ki, dünən gecə eyni aktiv bölgədə M3.3 sinifli partlayış da qeydə alınıb. Aktiv mərkəzin mövqeyi səbəbindən radiasiyanın böyük hissəsi Günəş diski tərəfindən bloklanıb və bu da müşahidə edilən göstəricilərin real gücdən aşağı olmasına səbəb olub. Hazırda Günəşin uzaq tərəfini birbaşa izləyən peyk olmadığından dəqiq ölçmələr aparıla bilmir.

Alimlərin proqnozuna görə, növbəti iki gün ərzində aktiv bölgə Yerə baxan istiqamətə dönəcək. Yalnız bundan sonra onun real parametrlərini qiymətləndirmək və qarşıdakı həftə üçün geomaqnit aktivliyi ilə bağlı etibarlı proqnoz vermək mümkün olacaq.

Kosmik Tədqiqatlar İnstitutunun aparıcı elmi işçisi Natan Eismont “aif.ru”ya açıqlamasında bildirib ki, Günəşdə baş verən hər alovlanma Yer üçün təhlükə yaratmır. Onun sözlərinə görə, yalnız güclü koronal kütlə atılmaları, yəni sıx plazma buludlarının Yerə doğru yönəlməsigeomaqnit fırtınalarına səbəb ola bilər.

Ekspert qeyd edib ki, bu cür maqnit fırtınaları bəzi insanlarda, xüsusən kosmik hava dəyişikliklərinə həssas şəxslərdə narahatlıq yarada bilər, lakin belə hallar nadir rast gəlinir. Ümumilikdə Günəş alovlanmaları və plazma atılmaları Günəş aktivliyinin normal və müntəzəm təbii prosesləridir.

Hazırda müşahidə olunan alovlanmaların Yer kürəsinə hər hansı bir təsiri tamamilə istisna edilir. Alimlər bildirirlər ki, aktiv bölgə Yerdən görünən sahəyə keçdikdən sonra vəziyyət daha dəqiq qiymətləndiriləcək və yalnız bundan sonra mümkün risklər barədə danışmaq olar.

Firuzə Əliyeva
Sfera.az

Günəşdə güclü alovlanmalar vaş verir: Yer üçün risk varmı?