Koronavirusun ilk müşahidə olunduğu ölkədə yoluxma halları artaraq iki ildən sonra yenə mini keçib və ən yüksək rəqəmə çatıb. Bu da ən azı 13 şəhərin yenidən təcrid edilməsi ilə nəticələnib. Sözügedən qərar çərçivəsində 30 milyona yaxın insan karantinə alınıb, xüsusi geyimli məmurlar küçələrə qayıdıblar. Bu fakt digər ölkələrdə də COVİD-19-la bağlı məsələni yenidən gündəmə gətirib.

 

Bununla bağlı Sfera.az-a açıqlama verən tibb elmləri doktoru, professor Musa Qəniyev deyib ki, hazırda dünyanı idarə edən məchul güclər daha çox maddiyyata bağlıdır və  onlar COVİD-19-un artıq sona çatmasını, fəsli infeksiya statusu almasını qəbul etmək istəmirlər. Professor qeyd edib ki, kütləviləşən yoluxma fonunda ana virusun letallıq mutasiyasına məruz qalaraq, genom fərqliliyi göstərən ilk mutant ştamın yarandığı tarix, pandemiyanın pik nöqtədən enişidir:

"Növbələşən mutasiyalar isə, pandemiyaların endemikləşərək lokallaşmağa və fəsli infeksiyaya çevrilməsinin başlanğıc tarixi hesab olunur. Növbəti bir ilin tamamı isə, artıq pandemiyanın bitməsinin təsdiqi dövrü sayılır. Digər tərəfdən, növbələşən mutantlarda genom fərqliliyi və klinik gedişdə fərqliliyin təsdiqi, 2021-ci ilin fevral ayının sonuna təsadüf etsə də, ÜST bu mutantları tapıldığı ölkələr üzrə ardıcıllıqla etiketləşdirmək məqsədilə, yunan əlifbası üzrə işarələnməsini 31 may 2021-ci tarixində rəsmiləşdirdi. Yəni növbələşən mutantlar bu tarixdən etibarən bütün dünyada rəsmən təsdiqləndi. Bundan bir il sonra, yəni  hazırkı 2022-ci ilin may ayının sonu və ya iyun ayında, ÜST hətta istəməsə belə, pandemiyanın sona çatdığını və ya çatmaq üzrə olduğunu rəsmən elan etməlidir”.

Mütəxəssis bildirib ki, COVİD-19-a gündəlik yoluxmanın kəskin artdığı bundan sonra nə qədər söylənsə, hətta dəfələrlə yazılsa belə, artıq təhlükə yoxdur.