Marta Kos Ermənistana səfər edəcək

Avropa İttifaqının genişlənmə məsələləri üzrə komissarı Marta Kos sentyabrın 19-20-də Ermənistana rəsmi səfər edəcək. 

 

Sfera.az xəbər verir ki, bu barədə Avropa Komissiyasının mətbuat xidməti məlumat yayıb.

 

Səfər çərçivəsində Kos Prezident Vaaqn Xaçaturyan, Baş nazir Nikol Paşinyan, Baş nazirin müavini Mqer Qriqoryan və daxili işlər naziri Arpine Sarqsyanla görüşlər keçirəcək. Görüşlərdə Ermənistan-Azərbaycan münasibətlərinin normallaşdırılması, bölgədə sülhün təşviqi və Aİ-nin Cənubi Qafqaz üçün əməkdaşlıq gündəliyi müzakirə olunacaq.

 

Komissarın həmçinin Avropa Yenidənqurma və İnkişaf Bankı ilə iki layihənin imzalanmasında iştirak edəcəyi, “EU4Sevan” biomüxtəlifliyin qorunması layihəsinin məkanını, eləcə də Yaradıcı Texnologiyalar Mərkəzi TUMO-nu ziyarət edəcəyi bildirilib.

 

Marta Kos səfər zamanı vətəndaş cəmiyyəti nümayəndələri, qadın liderlər və “Gənc Avropa səfirləri” təşəbbüsünün üzvləri ilə də görüşəcək.

 

Fidan Hacızadə
Sfera.az