Mənzillərdə fərdi istilik sistemlərinin, yəni kombilərin dövrü məhdudlaşır.

Nazirlər Kabinetinin yeni qərarı ilə binalar layihələndirilərkən artıq hündürlük faktoru əsas götürüləcək. Yeni qaydalara görə, yalnız 5 mərtəbəyə qədər olan binalarda fərdi istilik sisteminə icazə veriləcək. Məhdudiyyət təkcə texniki məsələ deyil.

Bu qərar kombi istilik dövrünün başa çatdığını göstərir? Bəs, hündürlük faktoru əsas götürüləcəksə, istilik sistemi necə qurulacaq?

Sfera.az-a bu haqda açıqlama verən əmlak eksperti Elnur Azadovun sözlərinə əsasən, tətbiq olunan qanunvericiliyin müəyyən əsasları var:

“Birincisi, ekologiya məsələsidir ki, bu da qaz emissiyalarının azaldılması ilə bağlıdır. İkinci məsələ isə binaların gələcəkdə daha erqonomik tikintisi ilə bağlıdır ki, onlar daha az enerji sərfiyyatlı olsunlar, enerji resursları bu binalarda daha çox qorunmuş olsun. Tikinti və şəhərsalma qanunvericiliyinə əsasən isə, binaların gələcəkdə pasportlaşdırılması da nəzərdə tutulub. Yəni bina nə dərəcədə erqonomik olarsa, enerji sərfiyyatı nə qədər az olarsa, bu digər qanundan irəli gəlir. Bu, Azərbaycan Respublikasının energetika və enerji sərfiyyatı qanunvericiliyinə istinadəndir”.

Ekspert ölkədə tikilən miniqazanxanalar haqqında da fikirlərini bölüşüb:

“Bakı şəhərinin kvartalları arasında qazanxanaların yenilənməsi və əlavə qazanxanaların tikintisi ilə bağlı layihə həyata keçirilir. Gələcəkdə bu qazanxanalara yeni inşa olunmuş binalar qoşulacaq. Ola bilər alternativ yol kimi tikinti şirkətləri tərəfindən həmin binaların həyətində öz mini qazanxanalarının tikintisi olacaq ki, onlar mərkəzdən və digər resurslardan asılı olmasınlar. Ola bilər, hətta gələcəkdə alternativ resurslarla binaların təchiz olunması məsələsi də gündəmə gəlsin – əgər onlar daha əlçatan olacaqlarsa. Yəni bunların hamısını zaman göstərəcək, hələlik bu istiqamətdə danışmaq tezdir. Birinci təcrübə qarşıdan gələn qışda artıq bu mini qazanxanalar sakinlərə təhvil veriləndə ortaya çıxacaq. Onların nə dərəcədə effektiv və qənaətli işləməsi məsələsinə baxılmalıdır”.

Bəsti Rəfizadə

Sfera.az

Kombi dövrü sonlanır - İstilik sistemi necə qurulacaq?