Gün ərzində yaşanan halsızlıq və diqqət dağınıqlığı müasir dövrün ən geniş yayılmış problemlərindəndir. Son vaxtlar həm elmi dairələrdə, həm də sosial platformalarda böyük maraq doğuran “qəhvə yuxusu” (coffee nap) metodu bu problemə qarşı innovativ yanaşma kimi təqdim olunur. Bu üsul qəhvə qəbulundan dərhal sonra qısa müddətli istirahəti nəzərdə tutur ki, bu da kofeinin enerjisi ilə yuxunun bərpaedici gücünü bir araya gətirir.

Sfera.az xəbər verir ki, mütəxəssislərin rəyinə görə, "qəhvə yuxusu" kofe içildikdən sonra alınan 10–15 dəqiqəlik fasilədir. Bu qısa zaman kəsiyində kofein hələ qana tam qarışmadığı üçün insan rahatlıqla yuxuya gedə bilir və beyinə qısa nəfəs dərdirir.

Kofein orqanizmə daxil olduqdan sonra nazik bağırsaq tərəfindən mənimsənilir və öz təsirini təxminən 30–45 dəqiqə ərzində göstərməyə başlayır. Beləliklə, qısa yuxu müddəti ilə kofeinin təsirə başlama anının üst-üstə düşməsi insanda daha yüksək oyanıqlıq və gümrahlıq hissi yaradır.

Bu metodun effektivliyi 1990-cı illərdən bəri müxtəlif araşdırmaların mövzusu olub. Məsələn, 1997-ci ildə aparılan bir təcrübə zamanı yuxusuzluqdan əziyyət çəkən iştirakçılara qəhvə içdikdən sonra 15 dəqiqə yatmaq tövsiyə edilib. Nəticədə məlum olub ki, bu üsulu tətbiq edən şəxslər diqqət tələb edən testlərdə və ümumi performansda digərlərini xeyli qabaqlayıblar.

Ekspertlər bildirirlər ki, "qəhvə yuxusu" iki mühüm mexanizmin sintezi üzərində qurulub: qısa yuxu beynin gərginliyini azaldaraq yorğunluğu aradan qaldırır, kofein isə oyanma anında diqqətin maksimum səviyyəyə çatmasını təmin edir. Nəticədə insan yuxudan qalxdıqda həm fiziki istirahətin, həm də kofeinin canlandırıcı effektini eyni anda hiss edir.

Bununla belə, gündəlik kofein normasını unutmamaq vacibdir. Sağlamlıq üçün təhlükəsiz hesab olunan miqdar 300–500 mq (təxminən 2–3 fincan) arasıdır. Normadan artıq istifadə əsəbilik, ürək döyüntüsü, narahatlıq və yuxu rejiminin pozulması kimi fəsadlara yol aça bilər.

Yekun olaraq qeyd edək ki, "qəhvə yuxusu" metodu qısa müddətdə iş qabiliyyətini artırmaq üçün əla vasitə olsa da, bu, yalnız müvəqqəti çıxış yoludur. Uzunmüddətli sağlamlıq və zehni gümrahlıq üçün keyfiyyətli və kafi gecə yuxusunu heç bir üsul əvəz edə bilməz.

Mənsumə
Sfera.az

Qəhvə içib yatmaq olar? – Yorğunluğu yox edən "sehrli" düstur