Gəncəyə yollanan müğənni: "Dilimiz tutuldu, fikirlərimiz çaş-baş oldu" - FOTO
11:03 / 02.11.2020
2008
"Bir həftə əvvəl Nigarla Gəncəmizə yollanmışdıq. Orada gördüklərimdən, yaşadıqlarımdan bir həftədir ki, hisslərimi, fikirlərimi cilovlayıb, yaza bilməmişdim".
Sfera.az xəbər verir ki, bu sözləri "Eurovision 2011" qalibi Eldar Qasımov sosial şəbəkədə yazıb.
İşğalçı Ermənistanın Gəncədə terror törətdiyi yerə yollanan Eldar Gəncədə keçirdiyi hissləri izləyiciləri ilə bölüşüb:
"Məqsədimiz erməni vəhşiliyi nəticəsində zərər çəkmiş ailələrə, yaxınlarını itirmiş insanlara, şəhid ailələrinə, mərd əsgərlərimizə dəstək olmaq və xüsusən də, ingilis dilli auditoriyamıza həqiqətləri hadisə yerindən çatdırmaq idi. Amma oraya ayaq atan kimi dilimiz tutulub, fikirlərimiz çaş-baş oldu. Ümidsiz baxışlara, kədərə, böyük qəmə rast gəldik. Sonra şəkildə gördüyüm 3 gün əvvəl kəfənə bükülmüş doğma balasını sinəsinə sıxıb, son öpüşünü bağışlayan atanı görüb anladım ki, hamımız onlar üçün daha güclü və iradəli olmalıyıq! Min dəfə dirilib düşmənə yerini göstərməliyik.
İnsanlarla danışdıqca, dərdlərini paylaşdıqca, bütün itkilərə, əzaba, kədərə baxmayaraq, onların ruhən nə qədər mərd olduqlarını görüb, Vətən uğrunda canlarından keçməyə hazır olduqlarını gördük. Çünki bizi Qələbəyə düşmənə nifrət yox, Vətənə sevgi aparır! O gün çox yaxındadır! Allah hamımızı qorusun. Qarabağ Azərbaycandır".
