19:T6c3,

“Meta” gənc istifadəçilərin rəqəmsal təhlükəsizliyini artırmaq məqsədilə “Instagram” və “Facebook” platformalarında süni intellekt əsaslı yeni yaş təsdiqləmə sistemini işə salıb.

Sfera.az xəbər verir ki, sosial media nəhəngi uşaqları qorumaq üçün hesabların təhlükəsizlik səviyyəsini artıran yeni addım atıb. Yeni texnologiya istifadəçilərin yalnız qeyd etdikləri yaşa etibar etməyərək paylaşılan fotoları, videoları və ümumi istifadəçi davranışlarını təhlil etməklə təxmini yaş profili yaradacaq.

“Meta” vurğulayıb ki, sistem üz tanıma texnologiyasından istifadə etmir və məqsəd fərdləri müəyyən etmək deyil, düzgün yaş qrupunu təyin etməkdir. Yaşını düzgün göstərmədiyi müəyyən edilən şübhəli hesablar avtomatik olaraq daha təhlükəsiz məxfilik kateqoriyasına köçürüləcək.

Bu kateqoriyaya aid gənc istifadəçilər üçün tanımadıqları şəxslərdən gələn mesajlar, gecə saatlarında bildirişlər və həssas məzmun məhdudlaşdırılacaq. “Meta”, xüsusilə on üç yaşından kiçik uşaqları qorumağa yönələn bu sistemlə, yaş tələbinə cavab verməyən hesablar üçün təsdiq tələb edə və ya hesabları platformadan silə biləcək.

Yeni sistem əvvəlcə Braziliya və Avropa Birliyi ölkələrində, gələn ay isə ABŞ və Böyük Britaniyada aktivləşdiriləcək.

Mənsumə

Sfera.az

"Instagram" və "Facebook"da yaş yoxlanışı dəyişir