Çində humanoid robotların iştirak etdiyi yarımmarafon yarışı texnologiya ilə idmanın maraqlı sintezini ortaya qoyub.

Sfera.az xəbər verir ki, paytaxt Pekində keçirilən “Pekin Elektron Şəhər Yarımarafonu və Humanoid Robot Yarımarafonu” çərçivəsində robotlar 21,1 kilometrlik məsafəni rekord sürətlə tamamlayaraq diqqət mərkəzinə düşüblər.

Yarışda "Honor" şirkəti tərəfindən hazırlanmış eyni model humanoid robot 50 dəqiqə 26 saniyə nəticə ilə birinci olub. Digər iki robot isə müvafiq olaraq 50 dəqiqə 56 saniyə və 53 dəqiqə 1 saniyə ilə finişə çatıblar. Bu göstəricilər insan yarımmarafon rekordlarını geridə qoyub.

Müqayisə üçün qeyd edək ki, kişilər arasında yarımmarafon üzrə dünya rekordu 2026-cı ilin martında Ceykob Kiplimo tərəfindən 57 dəqiqə 20 saniyə ilə müəyyən edilib. Qadınlar arasında rekord isə 2021-ci ildə Letesenbet Gidey tərəfindən 1 saat 2 dəqiqə 52 saniyə nəticə ilə qeydə alınıb.

Yarış zamanı minlərlə insan qaçışçı ilə yanaşı humanoid robotlar da paralel zolaqlarda mübarizə aparıb. Ümumilikdə müxtəlif şirkətləri, universitetləri və tədqiqat institutlarını təmsil edən komandalar 105 robotla yarışa qatılıblar.

Qeyd edək ki, ötən il keçirilən analoji yarışda “Tiangong Ultra” adlı robot 2 saat 40 dəqiqə 42 saniyə nəticə ilə qalib gəlmişdi. Həmin vaxt bir çox robotlar tarazlıq problemləri yaşayaraq yıxılırdı. Lakin bu il onların həm sürət, həm də koordinasiya qabiliyyətlərində ciddi inkişaf müşahidə olunub.

Mütəxəssislər bildirirlər ki, humanoid robotların qısa müddətdə əldə etdiyi bu irəliləyişlər Çində robot texnologiyalarının sürətlə inkişaf etdiyini göstərir. Rəsmi Çin humanoid robotları gələcəyin əsas texnologiyalarından biri kimi qiymətləndirir.

Gözləntilərə görə, bu tip robotlar gələcəkdə fəlakətlərin aradan qaldırılması, zəhərli mühitlərdə işləmə, sənaye istehsalı və yaşlılara qulluq kimi sahələrdə geniş tətbiq oluna bilər.

Mənsumə
Sfera.az

Yarımmarofonda rekord: Robotlar insanları geridə qoydu - FOTO