Elm və Təhsil Nazirliyinin dəstəyi və “STEAM Azərbaycan” layihəsinin təşkilatçılığı ilə noyabrın 17-də Beynəlxalq STEAM Azərbaycan Festivalının (SAF 2025) açılış mərasimi keçirilib.

Sfera.az xəbər verir ki, tədbirdə elm və təhsil naziri Emin Əmrullayev, dövlət rəsmiləri, millət vəkilləri, müxtəlif ölkələrin səfirləri, media qurumlarının rəhbərləri, ictimaiyyət nümayəndələri və digər qonaqlar iştirak ediblər.

Festival çərçivəsində müxtəlif məktəblərdən olan şagirdlər öz hazırladıqları yaradıcılıq nümunələrini, mühəndislik layihələrini, robototexnika işlərini və digər innovativ təqdimatlarını nümayiş etdirirlər. Tədbirin məqsədi məktəblilər arasında araşdırma, dizayn və problem həll etmə bacarıqlarının genişləndirilməsi, eləcə də onların elm və texnologiyaya marağının artırılmasıdır.

SAF 2025 gün ərzində müxtəlif sərgilər, təqdimatlar və interaktiv fəaliyyətlərlə davam edir.

Bəsti Rəfizadə
Sfera.az

Beynəlxalq STEAM Azərbaycan Festivalı keçirilir - FOTOLAR