Beynəlxalq Valyuta Fondu (IMF) 2027-ci ildə Azərbaycanda orta illik inflyasiyanın aprelin ortalarında gözlənilən 5,1 %-ə qarşı 4,2 %-ə düşəcəyini proqnozlaşdırır.

Sfera.az xəbər verir ki, İMF tərəfindən 2026-cı il üçün inflyasiya proqnozu 6 % səviyyəsində saxlanılıb.

Fondun qiymətləndirməsinə görə, 2028-ci ildə inflyasiya 4,1 % təşkil edəcək, 2029-2031-ci illərdə isə hər il 4 % səviyyəsində qalacaq.

"Gözlənilir ki, inflyasiya 2026-cı ilin sonuna qədər 6 %-ə yüksələcək, sonra isə 2027-ci ilin sonuna qədər 4,2 %-ə düşəcək. Buna qlobal əmtəə qiymətlərinin artması fonunda ərzaq məhsullarının bahalaşması səbəb olacaq. Cari hesab saldonun orta müddətli perspektivdə müsbət qalacağı gözlənilir. Lakin xarici mövqe orta müddətli fundamental göstəricilərə və arzu olunan iqtisadi siyasətə uyğun səviyyə ilə müqayisədə əhəmiyyətli dərəcədə zəif qiymətləndirilir. Proqnoz üzrə risklər ümumilikdə balanslaşdırılmış qalsa da, xarici qeyri-müəyyənlik yüksək olaraq qalmaqdadır", - hesabatda qeyd olunub.

IMF analitikləri hesab edirlər ki, Yaxın Şərqdə münaqişənin kəskinləşməsi karbohidrogen qiymətlərinin daha da artmasına gətirib çıxara bilər, bu da Azərbaycanın xarici və büdcə mövqeyini nəzərəçarpacaq dərəcədə yaxşılaşdıracaq:

"Eyni zamanda münaqişə qida məhsullarının dünya qiymətlərinə təsir vasitəsilə inflyasiya təzyiqini gücləndirə, ərzaq təhlükəsizliyinə təsir göstərə, miqrasiya təzyiqinə səbəb ola, dövlət xərclərinin artırılmasını tələb edə və biznes üçün qeyri-müəyyənliyi artıra bilər. Bu, büdcə konsolidasiyası və iqtisadiyyatın diversifikasiyası strategiyaları üçün risklər yaradır".

IMF-nin hesabatında vurğulanıb ki, inflyasiya təzyiqinin davam etməsi halında Azərbaycan Mərkəzi Bankı (AMB) faiz dərəcələrini artırmalıdır:

"Proqnoz dövründə inflyasiyanın azalması gözlənilsə də, yüksək xarici qeyri-müəyyənlik, Yaxın Şərqdə davam edən münaqişə fonunda artan inflyasiya riskləri, eləcə də hələ formalaşmaqda olan pul-kredit siyasətinin iqtisadiyyata ötürülmə mexanizmi nəzərə alınmaqla, inflyasiya risklərini diqqətlə izləmək və gözlənilməz inflyasiya sıçrayışlarına operativ reaksiya vermək son dərəcə vacibdir".

Fondun qiymətləndirməsinə görə, AMB pul-kredit siyasətinin müəyyən edilməsində inflyasiya proqnozlarından daha fəal istifadə etdiyi bir vaxtda aydın və gələcəyə yönəlmiş kommunikasiya getdikcə daha vacib olur.

IMF-də qeyd edilib ki, banklar arası bazarın dərəcələri uçot dərəcəsinə yaxın olaraq qalır, bu da AMB tərəfindən artıq likvidliyin uğurlu idarə olunmasından xəbər verir:

"Pul-kredit siyasəti siqnallarının iqtisadiyyatın real sektoruna ötürülməsinin əhəmiyyətli dərəcədə yaxşılaşdırılması risksiz gəlirlilik əyrisinin daha da inkişaf etdirilməsini, eləcə də dollarlaşma, yüksək əməliyyat xərcləri və bank sektorunda aşağı rəqabət səviyyəsi daxil olmaqla struktur problemlərin həlli istiqamətində işlərin davam etdirilməsini tələb edəcək".

Xatırladaq ki, Azərbaycanda 2025-ci ildə orta illik inflyasiya 2024-cü ildəki 2,2 %-ə qarşı 5,6 % təşkil edib.

Azərbaycan İqtisadiyyat Nazirliyinin proqnozlarına görə, ölkədə orta illik inflyasiya 2026-cı ildə 4,8 %, 2027-ci ildə isə 4,5 % təşkil edəcək. Azərbaycan Mərkəzi Bankının 2026-cı ilin fevralında dərc edilmiş son proqnozuna görə, cari ildə illik inflyasiyanın 5,5 %, 2027-ci ildə isə 4 % səviyyəsində olması gözlənilir./report

Azərbaycanda inflyasiya azalacaq - PROQNOZ