Məktəblilərin qayğılı şənbəsi – İctimai nəqliyyat yoxdur, amma dərsə getmək lazımdır...
15:31 / 15.09.2021
1128
Hazırda
müəllimləri də, şagirdləri də düşündürən əsas məsələlərdən biri 6 günlük dərs
rejiminin necə təşkil edilməsidir. Yəni bəzi məktəblərdə dərslər 5 deyil, 6 gün
olacaq və nəzərə alsaq ki, həftəsonu ictimai nəqliyyat işləmir, tədrisin hansı
formada reallaşdırılacağı sual altındadır.
Təhsil Nazirliyinin
cavabı isə təxminən bu cürdür - Qərarı Nazirlər Kabineti verir və ya məsələ məktəb
rəhbərliyi ilə həll edilməlidir.
Təhsil
eksperti Kamran Əsədov mövzu ilə bağlı Sfera.az-a açıqlamasında xatırladıb ki,
hazırda Azərbaycanın 3333 orta ümumtəhsil məktəbində tədris 11 illikdir, yerdə
qalanlar ibtidai siniflər və 9 illik məktəblərdir:
"Ümumilikdə
1,5 milyondan artıq şəxs tədris prosesinə gedəcək. Ən çox şagird sıxlığı təbii
ki, paytaxt Bakının payına düşür. Burada 440 minə yaxın şagird 320 məktəbə gedəcək.
Təkcə Bakıda 320 məktəbin 290-nı 5 günlük olsa da, yerdə qalan məktəblərdə dərslər
6 günlükdür. Bunun əsas səbəbi məktəblərdə şagird sıxlığı ilə bağlıdır. İkinci
növbəni təşkil etmək mümkün deyil, eyni zamanda məktəblərdə sinif çatışmazlığı
var. Bütün bunlar tədrisin 6 günlük sistemdə keçirilməsinə məcbur edir. Amma
ictimai nəqliyyat işləmədiyi üçün müəllimlər və şagirdlər üçün çətinliklər
yaranacaq”.
Müsahibimiz
qeyd edib ki, şənbə günləri günün müəyyən saatlarında Bakı Nəqliyyat Agentliyi
Təhsil Nazirliyi ilə birgə tədris prosesi 6 günlük olacaq ərazilərə xüsusi
avtobuslar təşkil edə bilər:
"Bundan
yalnız şagirdlər istifadə etməlidir. Bu, təhsilin əlçatanlığına nail olmağımıza
səbəb olar. Ümumilikdə Nazirlər Kabineti mövcud qərarda dəyişiklik edərək şənbə
günləri ictimai nəqliyyatın işləməsinə icazə verməlidir. Yalnız orta ümumtəhsil
müəssisələri deyil, ali təhsil müəssisələrində də tədris bərpa edilir. Bir sıra
universitetlər isə tədris təşkilində yeni qaydalara keçəcəklər.
Yəni
müharizə və seminarlarda 60 nəfərdən artıq tələbə iştirak etməyəcək. Bu, o deməkdir
ki, dərslərin gününün artırılmasına ehtiyac olacaq. Bu da birmənalı şəkildə şənbə
günlərinin hesabına baş verəcək. Məhz ali təhsil müəssisələrinin də yükünü nəzərə
alsaq, şənbə günü ictimai nəqliyyatın işlək vəziyyətdə olması qaçılmazdır”.
