Alimlərdən maraqlı nəticə: Bu bakteriyalar yaddaşı qorumağa kömək edə bilər
Probiotiklərin qəbulu yaşlı insanlarda bəzi koqnitiv funksiyaların zəifləməsini ləngidə və Alzheimer xəstəliyi ilə əlaqəli zülalın səviyyəsini azalda bilər.
Sfera.az xəbər verir ki, bu nəticə Cənubi Koreya alimlərinin apardığı araşdırmada əldə olunub. Tədqiqatın nəticələri “Journal of Alzheimer’s Disease” jurnalında dərc edilib.
Araşdırmada koqnitiv pozuntuların ilkin mərhələsində olan 87 yaşlı insan iştirak edib. Onlardan 40-ı 24 həftə ərzində bir neçə faydalı bakteriya ştammını ehtiva edən probiotik kompleksi qəbul edib, digər 47 nəfərə isə plasebo verilib.
Nəticələr göstərib ki, probiotik qəbul edən iştirakçıların qanında Alzheimer xəstəliyi ilə əlaqəli dəyişiklikləri göstərən pTau181 zülalının səviyyəsi əhəmiyyətli dərəcədə azalıb.
Bundan başqa, probiotik qrupunda koqnitiv pozuntuların qiymətləndirilməsi üzrə bəzi göstəricilər, xüsusilə yaddaşla bağlı nəticələr yaxşılaşıb. İştirakçılar məkan və vizual təsvirləri qavramağı tələb edən tapşırıqları da daha yaxşı yerinə yetiriblər.
Tədqiqatçılar sinir hüceyrələrinin vəziyyəti və beyində iltihabi proseslərlə əlaqəli göstəriciləri də araşdırıblar. Probiotik qəbul edənlərdə bu göstəricilər sabit qaldığı halda, plasebo qrupunda bəzilərinin artdığı müşahidə olunub.
Müəlliflərin fikrincə, bağırsaq mikroflorasına təsir göstərmək koqnitiv funksiyaların zəifləməsinin ilkin mərhələlərində əlavə dəstək üsulu ola bilər.
Bununla belə, araşdırma probiotiklərin Alzheimer xəstəliyinin qarşısını aldığını və ya onu müalicə etdiyini sübut etmir. Nəticələrin təsdiqlənməsi üçün daha genişmiqyaslı tədqiqatlara ehtiyac var.
Fatimə
Sfera.az
