“YouTube”-da mühüm dəyişiklik: Videolar ilk saniyədən izlənmiş sayılacaq
“YouTube” videoların baxış sayının hesablanması qaydasında mühüm dəyişiklik edir. 24 avqust 2026-cı ildən etibarən uzun formatlı videolarda və canlı yayımlarda baxış sayı video oynadılan, yəni ilk kadr göründüyü andan etibarən hesablanacaq.
Sfera.az xəbər verir ki, indiyədək uzun videolarda bir baxışın qeydə alınması üçün istifadəçinin videonu təxminən 30 saniyə izləməsi tələb olunurdu. Yeni sistemlə bu minimum izləmə müddəti tamamilə aradan qaldırılır.
“YouTube” ötən il Shorts videolarında tətbiq etdiyi bu sistemi artıq bütün video formatlarına genişləndirir. Şirkət bildirir ki, məqsəd müxtəlif formatlar arasında baxışların hesablanmasını eyni standartda birləşdirmək və videoların ümumi çatımını daha düzgün göstərməkdir.
Yeni qayda ictimai baxış saylarının daha sürətlə artmasına səbəb ola bilər. Lakin bu dəyişiklik kontent yaradıcılarının gəlirlərinə və “YouTube” İş Tərəfdaşlığı Proqramının şərtlərinə təsir etməyəcək.
Videonun real performansını qiymətləndirmək üçün izlənmə müddəti, izləyicilərin videoda qalma faizi və digər analitik göstəricilər əvvəlki kimi əhəmiyyətini qoruyacaq.
Mənsumə
