Texnologiya dünyasında yeni lider: Galaxy S27 Ultra rəqiblərini kölgədə qoymağa gəlir

Samsung Galaxy S27 Ultra modelinin ilkin texniki detalları və struktur dəyişiklikləri məlum olub.

Sfera.az bildirir ki, Cənubı Koreya texnologiya nəhənginin növbəti flaqman smartfonu olacaq Galaxy S27 Ultra haqqında ilk rəsmi məlumatlar GSMA tənzimləyici məlumat bazasında ortaya çıxıb. Cihazın 2027-ci ilin yanvar və ya fevral aylarında keçiriləcək növbəti "Galaxy Unpacked" tədbirində rəsmən təqdim edilməsi gözlənilir. Sızan son sənədlərə və tədarük zənciri hesabatlarına əsasən, smartfonda həm dizayn, həm də aparat təminatı baxımından köklü dəyişikliklər tətbiq olunacaq.

Kamera strukturunda inqilabi dəyişiklik: İkiqat teleobyektiv ləğv edilir

Galaxy S27 Ultra modelinin kamera dizaynında Samsung-un uzun illərdir davam etdirdiyi formul dəyişir. Sızan məlumatlara görə, şirkət arxa paneldəki şaquli kamera düzülüşündən imtina edərək horizontal (üfüqi) kamera layoutsuna keçid edə bilər. Ən böyük texniki dəyişiklik isə fərqli yaxınlaşdırma dərəcələrinə malik ikiqat teleobyektiv sisteminin ləğv edilməsidir. Cihazda illərdir istifadə olunan 3x optik yaxınlaşdırmalı köməkçi teleobyektiv kamerası tamamilə çıxarılır.

Bunun əvəzinə Samsung, 200 MP-lik əsas sensorun yüksək ayırdetmə imkanından istifadə edərək proqram təminatı ilə (sensor daxili kəsmə / sensor cropping) 3x yaxınlaşdırmanı təmin edəcək. Əsas kamera həmçinin dəyişən diafraqma (variable aperture) mexanizmi və növbəti nəsil LOFIC HDR sensor texnologiyası ilə gücləndiriləcək. Digər kameralar isə avtomatik fokuslama dəstəkli 50 MP-lik ultra geniş bucaqlı obyektiv və 5x optik yaxınlaşdırma təqdim edən 50 MP-lik periskop teleobyektivindən ibarət olacaq.

Performans və yaddaş: 2 nanometrlik çip və UFS 5.0 texnologiyası

Smartfon qlobal bazarda tamamilə yeni və TSMC tərəfindən 2 nanometrlik istehsal prosesi ilə hazırlanan Qualcomm Snapdragon 8 Elite Gen 6 Pro (və ya bəzi bölgələrdə Exynos 2700) çipsetindən güc alacaq. Bu çip xüsusi olaraq təkmilləşdirilmiş Adreno 850 qrafik prosessoru ilə təchiz edilib.

Yaddaş tərəfində isə Samsung, mobil sənayedə daha bir ilki reallaşdırmağa hazırlaşır. Cihazda məlumat oxuma və yazma sürətini köhnə nəslə nisbətən təxminən iki qat artıran UFS 5.0 daxili yaddaş modulu və LPDDR6 operativ yaddas (RAM) arxitekturası tətbiq olunacaq. Bu sürət artımı xüsusilə internet bağlantısı olmadan birbaşa cihaz daxilində işləyən (on-device) böyük süni intellekt (Galaxy AI) modellərinin performansını maksimuma çatdırmaq məqsədi daşıyır.

Ekran, təhlükəsizlik və batareya yenilikləri

Galaxy S27 Ultra, 6.9 düymlük, 144Hz yeniləmə tezliyinə malik Dynamic AMOLED ekran paneli ilə gələcək. Ekran hissəsində kənar şəxslərin baxışını maneə törədən avadanlıq səviyyəli "Privacy Display" (Məxfilik Ekranı) texnologiyası qorunub saxlanılır. Ön paneldəki 12 MP-lik selfi kamerasının yanında isə biometrik identifikasiyanı daha təhlükəsiz etmək üçün "Polar ID" adlanan yeni nəsil 3D üz-skanlama sistemi quraşdırılacaq.

Batareya tutumunun silisium-karbon texnologiyasından istifadə edilərək 6000 mAh səviyyəsinə qədər qaldırılması və cihazın 65W naqilli sürətli şarjı dəstəkləməsi gözlənilir. S Pen stilus dəstəyi isə Ultra modelinin eksklüziv özəlliyi olaraq qalmağa davam edəcək.

Qeyd edək ki, GSMA bazasındakı rəsmi qeydiyyat sənədlərinə görə, Samsung bu seriyada ilk dəfə olaraq ailəni dörd modelə çatdıracaq: standart Galaxy S27, S27+, seriyaya yeni əlavə olunan daha kiçik ekranlı S27 Pro və ən üst seqment S27 Ultra

Altay

Sfera.az