Neft ucuzlaşmaqda davam edəcək
ABŞ və İran arasında Hörmüz boğazının yenidən açılması ilə bağlı razılaşmanın əldə edilməsi neft qiymətlərinin enməsinə səbəb olur.
Sfera.az xəbər verir ki, "Brent" markalı xam neft bu ilin ən uzunmüddətli itki seriyasını yaşadıqdan sonra dörd gün ərzində 15 faiz ucuzlaşaraq, bareli 79 dollardan yuxarı qiymətə ticarət edilib.
ABŞ xam nefti (WTI) isə 76 dollar ətrafında dəyişib.
Qeyd edək ki, cümə günü imzalanması gözlənilən müvəqqəti razılaşma İrana neftini dərhal satmaq hüququ da daxil olmaqla, hərtərəfli maliyyə təşviqləri təklif edir.
Vaşinqton və Tehran arasındakı gərginliyə son qoymaq üçün atılan addımların qlobal enerji bazarlarında təchizat çatışmazlığını aradan qaldıracağı gözləntisi, son həftələrdə neft qiymətlərində kəskin azalmaya səbəb olub. İstehsalçılar, yükdaşıyanlar və enerji treyderləri hazırda müqavilənin daimi olub-olmadığını və Hörmüz boğazında gəmiçilik hərəkətinin normal vəziyyətə qayıtması üçün nə qədər vaxt lazım olacağını qiymətləndirirlər.
Texniki detallar üzərində iş davam edərkən, 14 maddəlik müqavilə layihəsi bu günə qədər olan razılaşma üçün ən aydın çərçivəni təmin edir. Razılaşmadan sonra tərəflərin münaqişəyə rəsmi olaraq son qoymaq və İranın nüvə proqramına yeni məhdudiyyətlər tətbiq etmək məqsədilə 60 günlük danışıqlara başlaması gözlənilir.
Layihə mətninə görə, İran kommersiya gəmilərinin təhlükəsiz keçidinə zəmanət verəcək, ABŞ isə Hörmüz boğazındakı məhdudiyyətləri aradan qaldıracaq. Fars körfəzini Hind okeanı ilə birləşdirən bu dar su yolu, dünya neft tədarükünün təxminən beşdə birinin normal şəraitdə daşındığı strateji tranzit nöqtəsidir.
Layihə müqaviləsinə, həmçinin ABŞ-ın İran xam nefti, neft-kimya məhsulları və onların törəmələrinin ixracı üçün güzəştləri də daxildir. Bu güzəştlərin bank, sığorta və nəqliyyat xidmətlərini də əhatə etməsi planlaşdırılır.
Vasif