Sülh sazişini İran tərəfdən kim imzalayacaq? - Detallar məlum oldu
ABŞ və İran arasında uzun müddətdir davam edən gərginliyi geridə qoyacaq daimi sülh sazişinin bu həftənin cümə günü imzalanması gözlənilir.
Sfera.az xəbər verir ki, bu barədə ABŞ Prezidenti Donald Tramp bəyanat yayıb.
ABŞ Vitse-prezidenti Ceyms Devid (JD) Vens İsveçrədə keçiriləcək imza mərasimi ilə bağlı mətbuata mühüm açıqlamalar verib. Vens rəsmi Vaşinqtonun mərasimdə İran tərəfindən Məclis sədri Məhəmməd Baqir Qalibaf və xarici işlər naziri Abbas Əraqçinin iştirakını gözlədiyini bildirib.
Saziş mətninin bu həftə ərzində ictimaiyyətə açıqlanacağını ümid etdiklərini deyən vitse-prezident, İranla bağlı iki mərhələli yoxlama prosesinin tətbiq olunacağını qeyd edib:
"Biz Hörmüz boğazının uzunmüddətli perspektivdə pulsuz və təhlükəsiz daşımalar üçün açıq qalmasını gözləyirik. Bununla belə, hələ də dəqiqləşdirilməsi vacib olan xeyli sayda detal var".
Sazişin İsrail aspektinə də toxunan Vens, "İsraildə bu razılaşmanı dəstəkləyən qüvvələrin olduğunu düşünürəm. Yeni Yaxın Şərq nizamında İsrailin mütləq şəkildə masada öz yeri olacaq", - deyə əlavə edib.
Prezident Donald Trampın verdiyi məlumata görə, saziş imzalandıqdan dərhal sonra Hörmüz boğazında minalardan təmizlənmə əməliyyatlarına start veriləcək. Bu prosesin başa çatması ilə dünya enerji ticarətinin ən strateji keçid məntəqələrindən biri olan boğaz, beynəlxalq dəniz nəqliyyatının istifadəsinə tam yenidən açılacaq.
Məsələ ilə bağlı İran tərəfindən də diqqətçəkən şərh gəlib. İranın xarici işlər nazirinin müavini Kazım Qaribabadi bildirib ki, əldə olunan konsensus təkcə ABŞ-İran münasibətlərini əhatə etmir, həm də regiondakı digər münaqişə ocaqlarına birbaşa təsir göstərmək gücündədir.
Bu çərçivədə, sazişin qüvvəyə minməsi ilə başda Livan olmaqla, Yaxın Şərqin müxtəlif cəbhələrində davam edən hərbi fəaliyyətlərin tamamilə dayandırılması istiqamətində real addımların atılacağı gözlənilir.
Bəsti Rəfizadə