Hörmüz açılsa da, problem tezliklə bitməyəcək: Bazarı gözləyən risklər
Neft bazarları ABŞ və İran arasında Hörmüz boğazının yenidən açılacağı, neft və qaz axınının bərpa ediləcəyi xəbərlərinə müsbət reaksiya versə də, analitiklər daşımaların əvvəlki normal vəziyyətə qayıtması üçün aylarla vaxt lazım olacağını bildiriblər.
Sfera.az xəbər verir ki, razılaşma təchizat risklərini və qiymətlərə davamlı yüksəliş təzyiqini azaldacaq. Amma gəmi sahibləri, sığorta şirkətləri və neft emalı zavodları arasında inamı bərpa etmək üçün uzun zamana ehtiyac olacaq.
Analitiklər qeyd edirlər ki, bir çox alıcı alternativ təchizat mənbələri və marşrutları tapmaqla artıq bu pozuntuya uyğunlaşıb. Bu o deməkdir ki, müharibədən əvvəlki ticarət şərtlərinə birbaşa qayıdış olmayacaq.
Çikaqoda yerləşən "Karobaar Capital" şirkətinin investisiya direktoru Haris Xurşid şərhində bildirib ki, neft-qaz bazarı Hörmüzün açılmasını adi bir proses kimi dəyərləndirir. Onun sözlərinə görə, fiziki axınlar tez bir zamanda bərpa oluna bilər, lakin etibar adətən belə olmur. Boğazın yenidən açılması ilə normal ticarət axınlarına qayıtmağın iki fərqli şey olduğunu əlavə edən Xurşid qeyd edib ki, bir çox alıcı alternativ marşrutlar, təchizatçılar və ehtiyatlar tapmaq üçün aylar sərf edib və boğaz yenidən açıldıqdan dərhal sonra geri qayıtmaya bilər.
"Saxo Markets" şirkətinin baş investisiya strateqi Çaru Çanana isə bildirib ki, bazar Hörmüz boğazının açılması ilə bağlı xəbərlərə müsbət reaksiya versə də, əməliyyat reallığı daha mürəkkəb olacaq. Onun sözlərinə görə, minatəmizləmə, sığorta xərcləri, liman tıxacları və geosiyasi maneələr riski barrel qiymətlərinin xəbərlərin gözlədiyindən daha yavaş hərəkət etməsinə səbəb ola bilər.
Vasif