Dünya Vatikanda dumanın yüksəlməsini gözləyir - Hazırlıqlar başladı
Vatikanda 7 may tarixində keçiriləcək papalıq seçkiləri öncəsi hazırlıqlar sürətlə davam edir. Sistina Şapelinin damına ənənəvi siqnal bacasının quraşdırılmasına artıq başlanılıb. Bu baca vasitəsilə milyonlarla insan yeni papanın seçilib-seçilmədiyini öyrənəcək.
Sfera.az “Hürriyet”ə istinadən xəbər verir ki, seçki zamanı səsvermə nəticələri simvolik dumanla dünyaya elan ediləcək.
Əgər səsvermədə yeni papa seçilməzsə, kardinal heyətinin səsini bildirdiyi bülletenlər sobada yandırılacaq və bacadan qara duman qalxacaq. Yeni papa seçildiyi halda isə ağ duman görünəcək, bu da yeni ruhani liderin müəyyənləşdiyi anlamına gələcək.
Səsvermədə kimlər iştirak edə bilər?
Katolik Kilsəsinin ən ali idarəedici orqanlarından biri olan Kardinallar Kolleci yeni papanı seçmək səlahiyyətinə malikdir. Papalar tərəfindən təyin olunan bu dini şəxslər əsasən piskopos rütbəsinə malikdir və ömürlük vəzifə daşıyırlar.
Vatikanın rəsmi açıqlamasına görə, dünya üzrə 252 kardinal mövcuddur. Lakin 1975-ci ildən etibarən tətbiq olunan qaydalara əsasən, 80 yaşdan yuxarı olan 114 kardinal səsvermədə iştirak edə bilməyəcək. Bu isə o deməkdir ki, seçkidə yalnız 138 kardinal səs verəcək.
Yeni papanın seçilməsi bir neçə tur davam edə bilər. Sistina Şapelində keçiriləcək konklava zamanı kardinallar tam təcrid olunmuş şəkildə qərar verəcəklər.
Dünya ictimaiyyəti isə Vatikanda yüksələcək dumanı gözləməyə davam edir.
Bəsti Rəfizadə
Sfera.az
