Baharın gəlişi ilə paytaxt Bakıda yenidən rəngarənglik yaranıb. Son günlər şəhər sakinləri və turistlər, xüsusilə də gənclər və ailələr Fəvvarələr meydanı, Dənizkənarı Bulvar və digər mərkəzi park və xiyabanlarda yaranan gözoxşayan mənzərələrin şahidi olurlar. Çünki şəhərin müxtəlif nöqtələrində minlərlə lalə çiçək açıb.

Sfera.az-ın çəkdiyi görüntülərdən də göründüyü kimi, lalələr şəhərin mərkəzi küçə və parklarını sanki təbiət muzeyinə çevirib. Qırmızı, çəhrayı, sarı, ağ və bənövşəyi rənglərdə lalələr bu yerlərə gələnlərin marağına səbəb olub. İnsanlar bu mənzərənin fonunda şəkillər çəkdirir, uşaqlar isə çiçəkli sahələrdə oynayaraq əylənirlər.

Bakının sakinləri belə mənzərənin onlara bayram ovqatı yaşatdığını deyir. Fotoaparatla gələnlər, mobil telefonları ilə çəkiliş edənlər, gülümsəyən uşaqlar və çiçəklər arasında addımlayan nənə-babalar şəhərin bahar ritmini hiss etdirir.

Güllərlə bəzədilmiş parklar yalnız estetik baxımdan deyil, həm də şəhərin ekoloji mühitinə müsbət təsir edir. Şəhər rəhbərliyi tərəfindən hər il keçirilən bu yaşıllaşdırma və abadlıq tədbirləri sakinlərin ruhunu oxşamaqla yanaşı, Bakının turizm potensialını da artırır.

Havaların isinməsi ilə parklarda ziyarətçilərin sayı da artıb. Ətraf mühitin qorunması və bu gözəlliyin uzun müddət qorunub saxlanılması üçün sakinlərə və turistlərə təmizlik və qaydalara riayət etmək tövsiyə olunur.

Baharın rəngli nəfəsini hiss etmək və sosial şəbəkələrdə yaddaqalan kadrlar paylaşmaq istəyənlər üçün indi Bakının mərkəzi əraziləri əsl fürsət məkanıdır.

Bəsti Rəfizadə

Bakının mərkəzi bahar çələnginə büründü: Lalələr şəhərə rəng qatır - FOTOLAR