Təbii yağlar, qədimi ayaqqabılar, milli naxışlar - "Hindistan günləri"ndən REPORTAJ

Artıq bir neçə ildir ki, paytaxt Bakıda keçirilən Hindistan sərgisi bu dəfə də ziyarətçiləri özünəməxsus zəngin və rəngarəng mədəniyyət nümunələri ilə qarşılayıb. 

Sfera-az-ın əməkdaşları Nizami kinoteatrında yayımlanan sərgidə iştirak edərək, Hindistanın milli geyimləri, təbii ipəkdən hazırlanmış şərflər, əl işi zinət əşyaları, naxışlı qab-qacaq, dekorativ xalçalar və müalicəvi xüsusiyyətlərə malik təbii daşlar, təbii baxım məhsulları, kosmetik vasitələr və hind mədəniyyətini əks etdirən müxtəlif vasitələrlə yaxından tanış olublar.

Satıcı Fidan İlyaslı sərgi barədə məlumat verərək bildirib ki, sərgidə təqdim olunan bütün məhsullar Pakistan və Hindistan istehsalıdır: “Qiymətlərimiz isə normal, orta səviyyədədir. Bəzi məhsullar isə daha yüksək qiymətlidir, çünki onlar çox keyfiyyətli və orijinal məhsullardır”.

O həmçinin, bitki tərkibli məhsulların faydalarından və qiymətlərindən danışıb: “Hər bitkinin öz funksiyası var. Miqren üçün çobanyastığı yağı, saç tökülməsinə qarşı isə aloe yağı tövsiyə olunur (qiymət 7 manat). Digər bitki yağlarımız da mövcuddur. Öskürək üçün 15 manata dermokremlər, sızanaqlara qarşı anti-akne kremlər, dərini ağardan və parladan kremlər mövcuddur. Ağrılar üçün serum və kremlərimiz var (15 manat). Kremlər 10 manatdan başlayır, həssas və normal dərilər üçün nəzərdə tutulub. Əl kremləri 10 manat, bədən kremləri  12 manatdan başlayır, tərkibində kokos yağı var.  Saç tökülməsinə qarşı 4 növ yağımız var: sarımsaq yağı və 9 bitkili qarışımlar. Saç tökülməsinin qarşısını alır, kəpəyə qarşıdır, saç uzadır və diblərini qidalandırır. Ən çox satılan məhsulumuz isə arqan yağıdır (15 manat)”.

Sərginin digər satıcılarından biri olan İlahə Shahzadın sözlərinə görə, masadakı məhsullar Hindistanın Dehli şəhərindən gətirilir:

"Hindistanlılar 2012-ci ildən etibarən mütəmadi olaraq buraya gəlir və müxtəlif sahələrdə fəaliyyət göstərirlər. Elə həmin ildən bu ticarət növü də get-gedə məşhurlaşmağa başlayıb. Məhsullar təmiz materiallardan — pambıq, kətan, ipək və s. hazırlanır. Stendimizdə qiymətlər olduqca münasibdir.  Məhsullar arasında qadın çantaları, şlyapalar, təmiz materiallardan hazırlanmış şərflər, təbii aksesuarlar, saç yağları və digər məhsullar mövcuddur”.

Hindistan sərgisi müxtəlif sahələrə marağı olan alıcılar üçün əsl kəşfdir. Burada həm etnik üslubda geyim axtaranlar, həm də ev dekorasiyası və orijinal hədiyyələr almaq istəyənlər üçün geniş seçim imkanı yaradılıb.

Sərgidə qadınlar üçün baxım məhsulları, kosmetik vasitələr, ziynət əşyaları, çaylar və düyülər kimi qida məhsulları mövcuddur. Hətta bu məhsulları istifadə etmədən belə, qoxularını evdə hiss etmək mümkündür. Ayrıca, xüsusi ədviyyatlar, yataq dəstləri, yaylıqlar, şarf, inanclı adamlar üçün şamlar və buxarilər də sərgidə təqdim olunur. Bir sözlə, sərgidə diqqətimizi cəlb edən müxtəlif geyim, qida və digər məhsullar yer alır. 

Sərgi yalnız satış məqsədi daşımır – burada həm də Hindistanın qədim sənət ənənələri, estetik zövqü və mədəni irsi haqqında dolğun təsəvvür yaranır. 
Sərgi hər il paytaxt sakinləri və şəhərin qonaqları tərəfindən böyük maraqla qarşılanır. Bu cür tədbirlər müxtəlif xalqlar arasında mədəni əlaqələrin güclənməsinə, həmçinin sənət və əl işlərinə olan marağın artırılmasına töhfə verir.

Qeyd edək ki, sərgi 7 martdan kinoteatrda təqdimata başlayıb və 23 mart tarixində bitəcək. Qonaqlar saat 11:00-19:00 aralığında bura baş çəkə bilərlər.

Fidan Hacızadə

Fotolar: Anar Bayramlı