FTB Kennedinin sui-qəsdinə dair 2400 məxfi qeyd tapdı - FOTO

ABŞ-nin Federal Təhqiqatlar Bürosu (FTB) ABŞ-nin 35-ci Prezidenti Con Kennedinin öldürülməsi ilə bağlı əvvəllər rəsmi komissiyaya təqdim edilməmiş təxminən 2400 qeyd aşkar edib. 

Sfera.az xəbər verir ki, bu barədə “Axios” portalı mənbələrə istinadən məlumat yayıb.

“FTB Prezident Kennedinin qətli ilə bağlı 2400-ə yaxın qeyd aşkar edib ki, onlar heç vaxt bu sənədlərin öyrənilməsi və yayılması ilə məşğul olan komissiyaya təqdim edilməyib. Hələ də məxfi saxlanılan bu qeydlər FTB-nin Prezident Donald Trampın 23 yanvar sərəncamı ilə başlatdığı araşdırma zamanı aşkar etdiyi 14 min səhifəlik sənədlərdə var", - hesabatda deyilir.

Nəşrin mənbələrinə görə, Ağ Ev bu sənədlərin mövcudluğunu keçən həftənin cümə günü öyrənib, aşkar edilmiş qeydlərin məzmunu ciddi şəkildə məxfiləşdirilib. 

"Axios" onu da qeyd edir ki, portala bu qeydlərin mövcudluğu barədə məlumat verən üç mənbə sənədləri görməyib.

Firuzə Əliyeva