Macarıstan veto hüququndan istifadə edə bilər - Orban şərtlərini AÇIQLADI
Macarıstanın Baş naziri Viktor Orban Rusiyaya qarşı sanksiyaların uzadılması şərtlərini açıqlayıb.
Sfera.az bildirir ki, o, bu barədə “Kossuth” radiostansiyasının səhər proqramında danışıb. Orban qeyd edib ki, Avropa İttifaqının Rusiyaya qarşı sanksiyalarının uzadılması Ukraynanın enerji resurslarının tranziti ilə bağlı bir sıra şərtləri yerinə yetirməsindən asılıdır.
“Əgər Ukrayna Rusiyaya qarşı sanksiyalar da daxil olmaqla yardım almaq istəyirsə, o zaman qaz tranzitini bərpa etməli, “Türk axını” qaz kəmərinə hücumları dayandırmalı və Rusiya neftinin öz ərazisindən tranzitinə qadağalar qoymamalıdır”, deyə Viktor Orban bildirib.
O vurğulayıb ki, bu şərtlər yerinə yetirilmədən, bir həftə ərzində qərar verilməli olan sanksiyalar uzadılmayacaq.
Qeyd edək ki, Ukraynanın tranzitini dayandırmasından sonra Macarıstan Rusiya qazını almaq imkanını itirmiş Avropa ölkələrindən birinə çevrilib. Aİ hazırda Rusiyaya qarşı yeni məhdudiyyətlərin tətbiqi ilə bağlı razılığa gəlməyə çalışsa da, Macarıstan veto hüququndan istifadə edə bilər.
Günay
