“Həmin qız evdə də şiddətə məruz qalır və bunu normal qəbul edir" - Birgə BƏYANAT

“Son illərdə məktəbdə bullinq hallarında qızların daha çox önə çıxması təəssüf doğurur. Baş verənlərin kökündə isə oğlanlar uğrunda gedən mübahisələr və münaqişələrdir”.

Sfera.az bildirir ki, bu barədə Təhsil Ekspertləri Mərkəzinin birgə bəyanatında qeyd olunub.

Bildirilib ki, 156 nömrəli məktəb şagirdinin bullinq etdiyi qızın heç bir reaksiya verməməsinin iki səbəbi ola bilər:

“Həmin qız evdə də şiddətə məruz qalır və bunu normal qəbul edəcək qədər travma alıb. Nə qədər ki ailədə hüquqları pozulan uşaqlar dövlət tərəfindən ailədən alınıb xüsusi təhsil müəssisələrinə verilməyəcək, bu halların sayı da artacaq. İkincisi, görünən odur ki, həmin uşaqla bağlı onu təhqir edənlərdə çox güclü kompramat - video, şəkil və ya səs yazısı var. Bu kompramat onu təhqir edən qızın marağında olan oğlanla bağlıdır.. Hər bir halda sinif rəhbərlərinin peşəkarlığının aşağı olmasının təzahürüdür. Eyni zamanda, təcavüz edən qızların ailə tərbiyəsində ciddi problemlərin olduğunu görünür”.

Bəyanatda bildirilib ki, baş verən hər bir hadisəyə ciddi yanaşılmalıdır:

“Rayon İcra Hakimiyyətlərinin humanitar şöbələri yanında “Yeniyetmələrin hüquqlarının müdafiəsi üzrə Komissiya”nın fəliyyəti genişləndirilməli, bu vəzifəyə bir neçə müvafik qurumlarla razılaşdırmaqla müəyyən edilmiş təcrübəli şəxslər təyin olunmalıdır. Valideynlər tərəfindən şiddət və zorakılıq, o cümlədən, təhsil və digər hüquqları pozulan uşaqlar ailələrdən alınıb dövlətin himayəsinə verilməli, şiddət və zorakılıq göstərən valideynlər valideynlik hüququndan mərhum edilməlidir. Ümumi təhsil müəssisəsində tərbiyə mühitinin yaradılması və ya möhkəmləndirilməsi üçün məktəblərin fərdi nizamnamələri hazırlanıb təsdiq edilməlidir. Məktəb nizamnaməsində təhsil prosesinin bütün tərəflərinin hüquqları, vəzifələri, məsuliyyəti aydın şəkildə göstərilməlidir. Qaydalara riayət edənlər üçün rəğbətləndirmə və etməyənlər üçün isə cəza sistemi müəyyən edilməlidir”.

Həmçinin əlavə olunub ki, qanunvericiliyin tələblərinə uyğun olaraq məktəblərdə cinsi zorakılıqla bağlı 7-ci sinifdən başlayaraq dərsdənkənar məşğələlərin tədrisinə başlamaq, bu məşğələlərdə valideynlərin iştirakı təmin olunmalıdır:

"156 nömrəli məktəbdə baş verən hadisədə iştirakçı olan yeniyetmələr valideynlərindən alınaraq xüsusi tərbiyə müəssəsinə yerləşdirməklə bu kimi hadisələrin gələcəkdə təkrarlanmasını minimuma endirə bilərik".

Türkan