Sədərək, yarmarka, market... - Qiymətlər harada sərfəlidir? - REPORTAJ
Artıq yeni ilə sayılı günlər qalıb. Buna görə indidən insanlar bayram aksessuarlarına maraq göstərməyə başlayıb. Yeni il atributlarını isə marketdən, yaxud bayram yarmarkalarından əldə etmək mümkündür.
Lakin bu məhsulları daha ucuz almaq üçün Sədərək Ticarət Mərkəzinə üz tutanlar da az deyil. Hər üç məkanda isə məhsullar da, qiymətlər də fərqlidir.
28 May metrostansiyasının yaxınlığında fəaliyyət göstərən bayram yarmarkasında demək olar ki, Yeni il bayramına aid bütün aksesusarlar var. Yəni bayram alış-verişini buradan birdəfəlik etmək mümkündür.
Yarmarkada satıcıların dediyinə görə, qiymətlər ötən ilə nisbətdə daha yüksəkdir.
Sfera.az-a açıqlama verən satıcılar Sədərək Ticarət Mərkəzinə “ucuz mal almaq” düşüncəsi ilə getməyin düzgün olmadığını dedilər:
“Gəlirlər, baxırlar, amma satış çox zəifdir. Yolkaların qiyməti 5 manatdan 100 manatadək dəyişir. Oyuncaqlar isə 2 manatdan 22 manatadəkdir. Hədiyyə qutularını isə 1-2 manata satırıq. Suvenerlərin qiyməti isə 15-20 manatadək dəyişir. Qida məhsullarına baxanda bayram aksessuarlarının qiymətində elə də bahalaşma yoxdur, amma yenə də müştərilərimiz az olur. Məhsulları Sədərəkdən gətirib satırıq. Orada qiymətlər necədirsə, burada da elədir. Yəni Sədərəkdən toplu məhsul almaq ucuz başa gəlir, tək-tək nə isə almaq üçün elə yarmarkaya gəlmək lazımdır”,- satıcılar qeyd edib.
Yarmarkada ən aşağı qiymət 0,20 AZN-ə olan şam ağacı aksessuarıdır, ən baha qiymət isə 200 manatlıq yolkaya aiddir. Şam ağaclarının qiyməti isə sadə, yaxud bəzəkli olmasına görə baha, yaxud ucuz ola bilir. Məsələn, 1,20 sm hündürlükdə olan sadə yolka 25 manata, üzərində müəyyən qədər bəzək olan həmin ölçülü yolka isə 65 manata təqdim olunur. 1,50 sm sadə yolka 35 manata, ağ qar örtüyü ilə bəzənmişi isə 100 manatadır. 2,10 sm sadə yolka 80 manat, bu hündürlükdə nisbətən bəzəkli olanı isə 150 manata təklif olunur.
Yolka üçün nəzərdə tutulan oyuncaqların qiymətləri isə 2-25 AZN, çılçıraqlar 0,50-1 AZN arasında dəyişir.
Marketlərdə isə bayram aksessuarlarının qiyməti yarmarkadan xeyli fərqlənir. Belə ki, “Bravo” supermarketində 2,10 sm yolka 227 manata, orta ölçülü şam ağacı oyuncaqlarının qiyməti isə 3-33 manat arasında təqdim edilir.
“Neptun” supermarketində isə digər marketlərdən fərqli olaraq içərisində müxtəlif şirniyyatlar olan hədiyyə qutuları satılmaqdadır. Bu qutular isə 3-6 manat arasında alıcılara təklif edilir. Şam ağaclarının qiymətləri isə 180-200 manat arasındadır.
Sədərəkdə qiymətlər aşağıdır, satış isə...
Sədərək Ticarət Mərkəzindəki vəziyyətlə tanış olmaq üçün isə üz tutduq adıçəkilən əraziyə. İlkin olaraq onu qeyd edək ki, burada bayram aksesuarları mərkəzin “Şirniyyat” adlanan bölməsində satılır və demək olar ki, böyük bir ərazi sırf bayram aksesuarları üçün ayrılıb.
Ticarət mərkənizdə satıcı olan Mikayılov Elmin yolkaların qiymətinin materialına görə dəyişdiyini bildirdi:
“Ucuz, yaxud baha yolka anlayışı qiymətə görə müəyyənləşir. Məsələn, 2,10 sm olan plastik yolkanı 220 manata, materialı dəmirdən olan yolkanı isə 240 manata satırıq. Satışda olan ən baha yolkamızın hündürlüyü 3 metrdir onu 600 manata satırıq. Bayram aksesuarlarını Çindən gətiririk, alıcılıq səviyyəsi isə ən çox dekabrın sonuna doğru yüksək olur”.
Sahibkar Sərxan Qasımov isə dedi ki, satışda olan yolkaların qiyməti 4 manatdan başlayır və artmaqda davam edir:
“Ən kiçik ölçülü yolkalaramız 60 sm-dir, onları da 4 manata satırıq. Amma 3 metr hündürlüyündə 500-600 manata satdığımız şam ağacları da var. Sədərəkdən topdan alış sərf edir, nəinki hansısa məhsulu tək-tək almaq”.
Yeni il aksessuarlarının satışını həyata keçirən Elton Rufullayev Sərədəkdən məhsul alarkən endirim edildiyini deyib, bu mənada alıcıların bura daha çox üz tutduğunu qeyd etdi:
“Oyuncaqların qiyməti 0,50 AZN-dən 50 manatadək dəyişir. 1,50 sm yolkanı 30 manata, 1,70 sm-1,80 sm sadə yolkanı isə 70 manata satırıq. Keçən ilə nisbətdə alıcılıq səviyyəsi yaxşıdır, amma ümumi mənzərə o qədər də ürəkaçan deyil. Qiymət artımı ötən illə nisbətdə hər məhsulda özünü göstərir. Yeni il aksessuarlarını buradan almağın yaxşı tərəfi odur ki, biz endirim edirik, yarmarkada olan satıcılar isə endirim etmir”.
Satıcı Quliyev Fuadın sözlərinə görə, ötən illə nisbətdə bu il yolkaların qiymətində daha çox artım var:
“Ən baha yolkamız 3 metr hündürlüyündədir və rezindən hazırlanıb. Onu 1300 manata satırıq. Yolka oyuncaqları 1 manatdan başlayır və sayına, ölçüsünə görə 20 manatdək artır. 5 metrlik yolka işığını 4 manata, 100 metrlik işığı 50 manata satırıq. Uşaqlar üçün üçlü boş hədiyyə qutularını 6 manata satırıq, şəhərdə bu qiymətlər daha yüksək olur. Hələ ki, satışdan razıyıq, qiymətlər keçən illə nisbətdə çox da baha deyil. Bahalaşmanı daha çox yolkaların qiymətində hiss etmək olur”.
Qeyd edək ki, ticarət mərkəzində orta ölçülü Qar qız suvenerləri 18-30 manata, 1,70 sm-2 metr hündürlüyündə Şaxta baba, Qar qız suvenerləri isə 200-280 manata təklif edilir.
Müxbir: Əzizə Zeynal
Fotolar: Anar Bayramlı
