Hindistanın qadağası buğda qiymətlərini daha da yüksəltdi
Media
13:27 / 16.05.2022
2101
Hindistanın buğda ixracına qadağa qoyma qərarından sonra buğda fyuçersləri son iki ayda ən yüksək tempə çatıb.
Sfera.az xəbər verir ki, ABŞ-da Çikaqo bençmark buğda fyuçersləri 6 faiz artaraq 12.47 dollar olub. Bu, son iki ayda görülən ən yüksək artım kimi dəyərləndirilib. Bununla da ilin əvvəlində olan buğda qiymətləri ilə indiki qiymət arasında 60 faiz fərq qeydə alınıb.
Xatırladaq ki, bu yaxınlarda Hindistan ərzaq təhlükəsizliyi riskinə görə buğda ixracını qadağan etmişdi. Dehli rəhbərliyi bu addımı ilə ilin əvvəlindən qlobal bazarlarda ən az 40 faiz artan buğda qiymətinə ölkə daxilində nəzarət etməyi hədəflədiyini açıqlayıb. Hindistan buğdasını əsasən qonşu ölkələr Banqladeş, Nepal və Şri-Lankaya ixrac edir.
Qeyd edək ki, dünya buğda ixracatında mühüm rolu olan Rusiya ilə Ukrayna arasında yaşanan gərginlik buğda tədarükünün mənfi təsirə məruz qalmasına, qiymətlərdəki yüksəliş təzyiqinin davam etməsinə, Ukraynadan buğda ixracının dayanmasına səbəb olub.
Rusiya-Ukrayna müharibəsi qlobal buğda tədarükünü artıq dayandırdığından, bir çox ölkə buğda kəsirini bağlamaq üçün gözlərini Hindistana dikib. Dünyanın ikinci ən böyük buğda istehsalçısı olan Hindistanda təsirli olan həddindən artıq istilər kənd təsərrüfatı sektoruna ciddi təsir edib və məhsuldarlığını təhlükə altına alaraq tədarük problemini daha da ağırlaşdırıb.
Əzizə Zeynal
Sfera.az
