Şimali Koreyadan koronavirus ETİRAFI - Kim Çen İn ölkədə fövqəladə vəziyyət elan etdi
Media
12:06 / 12.05.2022
1049
Pandemiyanın başlanğıcından bəri ölkədə koronavirusun olmadığını iddia edən Şimali Koreyanın son açıqlaması təəccübləndirib.
Sfera.az bildirir ki, ölkədə virusa ilk yoluxma halının qeydə alındığı açıqlanıb.
Ölkənin yerli mətbuatının məlumatına görə, paytaxt Pxenyanda aşkarlanan xəstədə "Omicron” əlamətləri görülüb.
Dövlətə bağlı Mərkəzi Xəbər Agentliyi (KCNA) isə lider Kim Çen İnin rəhbərliyi altında böhran iclasının keçirildiyini bildirib. Məlumata görə, ölkədə virusa nəzarət sistemi tətbiq ediləcək. KCNA, məqsədin virusu ən qısa zamanda məhv etmək olduğunu bildirsə də, bunun necə ediləcəyi ilə bağlı heç bir təfərrüat verilməyib. Daha sərt karantin tədbirlərinin həyata keçiriləcəyinə işarə edən Kim Çen İn, xalqın yüksək siyasi şüuru sayəsində fövqəladə vəziyyətin öhdəsindən mütləq gələcəklərini söyləyib. Qeyd olunub ki, Şimali Koreya lideri bu kontekstdə bütün ölkədə karantin qaydalarının tətbiqi ilə bağlı əmr imzalayıb.
Digər tərəfdən Şimali Koreya həm Çin istehsalı olan "Sinovac”, həm də "AstraZeneca” peyvəndi üçün təklifləri rədd etmişdi. Bu səbəbdən bir çox ölkədə sona çatan pandemiyanın bu ölkədə minlərlə insanın ölümünə yol açacağı barədə qorxulu proqnozlar səsləndirilir. Mütəxəssislər, ölkənin kəskin pandemiya tədbirləri görərək Çindəkinə bənzər bir yolu gedə biləcəyini də vurğulayırlar.
Qeyd edək ki, Şimali Koreya pandemiyanın başlanğıcından bəri sərhədlərini bağlı saxlayaraq virusu uzaq tutmağı hədəfləmişdi. Bu siyasət, öz növbəsində, kasıb ölkəyə lazımi təchizat axınını xeyli azaltdığından, ağır iqtisadi vəziyyətə və ərzaq qıtlığına səbəb olmuşdu.
Günay Rəsulqızı
Sfera.az