\"Yaxın günlərdə Rusiya-Ukrayna cəbhəsində vəziyyət daha da gərginləşəcək\" - Politoloqdan AÇIQLAMA

ABŞ prezidenti Co Bayden Ukraynaya 33 milyard dollar yardım ayrılması üçün Konqresə müraciət edib. Bu məbləğin 20,4 milyard dolları hərbi məqsədlərə sərf olunacaq, 8,5 milyardı Ukrayna büdcəsinə köçürüləcək, qalan 3 milyardı humanitar məqsədlərə xərclənəcək.
 
Bununla bağlı Sfera.az-a açıqlama verən politoloq Əlimusa İbrahimov deyib ki, bu qərardan sonra ABŞ tərəfindən Ukraynaya yardım məqsədi ilə ayrılan vəsaitin yaxın günlərdə 10 dəfə  artırılmasının şahidi olacağıq:
 
"Rusiya ilə Ukrayna arasında müharibənin baş verdiyi iki ay müddətində ABŞ tərəfindən Ukraynanın silah və hərbi sursatla təmin edilməsinə xərclənən vəsaitin cəmi 3,3 milyard dollar olduğunu nəzərə alsaq, konqresin ayıracağı yeni yardım paketinin Zelenskiyə nələr vəd etdiyini təsəvvür etmək mümkündür. Bu vəsait Ukrayna ordusunun çox qısa zamanda NATO standartlarına çatdırılması ilə nəticələnəcək. Ukrayna 2014-cü ildən bəri, dinc şəraitdə orduda həyata keçirə bilmədiyi yenidənqurmanı çox qısa zamanda, şiddətli döyüşlər gedə-gedə yerinə yetirəcək”.
 
Politoloqun sözlərinə görə, ABŞ-la yanaşı, Avropa ölkələri və NATO-nun digər üzvləri də yardım edənlər sırasında var:
 
"Görünən budur ki, yaxın günlərdə Rusiya-Ukrayna cəbhəsində vəziyyət daha da gərginləşəcək. Bütün bu təzyiqlərin qarşısında Rusiyanın davam gətirməsi getdikcə çətinləşir. Belə durumda Rusiyanın tez-tez nüvə silahının istifadəyə gətirilə biləcəyi haqqında xəbərdarlıqların nə məqsədlə edildiyi məlum olur. Rusiyanın manevr etmək imkanları hər keçən gün azalır. Tunelin sonunda nüvə başlıqları ilə təchiz olunmuş "Sarmat”ların kölgəsi görünür”.
 
Günay Rəsulqızı
Sfera.az