Son 8 ildə ilk dəfə: Manatda bahalaşma rekord həddə çatdı
12:02 / 22.04.2022
1142
2022-ci ildə Azərbaycan manatının həm nominal, həm də real məzənnəsində yüksəliş davam edib.
Sfera.az Mərkəzi Banka istinadən xəbər verir ki, bu ilin martında qeyri-neft sektoru üzrə manatın nominal məzənnəsi ötən ilin martına nisbətən 26,6 faiz artıb. Bu müddətdə real məzənnə isə 19,9 faiz yüksəlib.
Məlumatların təhlili göstərir ki, qeyri-neft sektoru üzrə manatın nominal məzənnəsi və real məzənnəsi 2014-cü ildən sonra ən yüksək həddə çatıb. Başqa sözlə, indi manat son 8 ildə olmadığı qədər bahadır.
Qeyd edək ki, nominal məzənnə manatın digər bir ölkənin valyutasına qarşı olan məzənnəsini ifadə edir.
Real məzənnə isə müqayisə olunan ölkələrdə inflyasiya səviyyəsi də nəzərə alınmaqla hesablanmış məzənnədir.
Manatın real məzənnəsinin yüksəlməsi o deməkdir ki, Azərbaycanda mal və xidmətlərin dəyəri ticarət tərəfdaşları olan ölkələrlə müqayisədə daha çox yüksəlib. Deməli, ölkəmizdə xarici bazarlarla müqayisədə eyni növ məhsullar daha bahadır.
Buna görə də manatın real məzənnəsinin yüksəlməsi qeyri-neft sektoru üzrə ixraca mənfi təsir etdiyi kimi, idxalı daha əlverişli edir.
Vasif
Sfera.az
