Azərbaycanın ən çox və ən az gəliri olan bələdiyyələri - SİYAHI
Media
15:03 / 11.04.2022
1433
Azərbaycanda fəaliyyət göstərən bələdiyyələrin (yerli özünüidarəetmə orqanı – red.) 2021-ci il üzrə gəlirləri açıqlanıb.
Rəsmi məlumatlardan aydın olur ki, ölkəmizdəki 1606 bələdiyyənin gəliri qeyri-bərabər paylanıb.
Sfera.az xəbər verir ki, ötən il yerli özünüidarəetmə orqanları ümumilikdə 41,65 milyon manat gəlir əldə edib.
Ən çox gəlirə sahib olan bələdiyyələr Sumqayıt və Gəncə şəhərlərindəki bələdiyyələr olub. Sumqayıtda 3 bələdiyyə var və onların ortaillik gəliri 620 min manatdır. Gəncə də 3 bələdiyə fəaliyyət göstərir və onların gəliri isə orta hesabla 418 min manat olub. Summqayıt və Gəncə bələdiyyələri üzrə gəlirin yüksək olması yerli özünüidarəetmə orqanlarının sayının az olması ilə bağlıdır.
Ümumilikdə, götürdükdə Bakı bələdiyyələrinin gəliri daha çox olsa da, yerli özünüidarəetmə orqanlarının sayının çoxluğu bir bələdiyyəyə düşən gəlirin azalmasına səbəb olur. Belə ki, Bakıda 53 bələdiyyə var və onlar 11,55 milyon manat qazanc əldə edib. Bir bələdiyyəyə düşən orta gəlir 218 min manatdır.
Abşeronda da bələdiyyələrin ümumi gəliri yüksəkdir. Amma burada 15 bələdiyyənin olması bir bələdiyyəyə düşən gəlirin azalmasına səbəb olub. Abşeronda bələdiyyələr ümumilikdə 2,35 milyon manat, bir bələdiyyə isə orta hesabla 157 min manat qazanıb.
Digər heç bir rayon və şəhərdə bələdiyyələrin illik gəliri orta hesabla 50 min manatdan çox olmayıb. Nisbətən yüksək gəliri olan bələdiyyələr Siyəzən rayon (49 min manat), Zaqatala rayon (45,5 min manat), Qax rayon (43 min manat) bələdiyyələridir.
Bəzi yaşayış məntəqələrində isə bələdiyyələrin gəliri olduqca azdır. Bu sıraya Lerik rayon (2,3 min), Daşkəsən rayon (5 min manat), Qobustan rayon (5,1 min manat), Saatlı rayon (5,8 min manat), Cəlilabad rayon (5,8 min manat) bələdiyyələri daxildir.
Ümumən, Azərbaycanda bir bələdiyyənin ortaillik gəliri 26 min manat, Naxçıvan Muxtar Respublikasında 7,2 min manat olub.
Vasif
Sfera.az
