Bayden 100 min ukraynalıya söz vermişdi: ABŞ martda niyə cəmi 12 nəfəri qəbul etdi? - SƏBƏBLƏR
Media
14:16 / 11.04.2022
955
ABŞ prezidenti Co Baydenin Rusiyanın işğalından sonra ölkələrini tərk edən 100 min ukraynalını qəbul edəcəklərini açıqlamasına baxmayaraq, mart ayında ABŞ qaçqın proqramından cəmi 12 nəfər keçib.
Sfera.az xəbər verir ki, minlərlə ukraynalının Meksika sərhədindən və müxtəlif vizalarla qanuni yolla ölkəyə daxil olduğu bilinsə də, Konqres üzvləri və hüquq müdafiəçiləri sığınacaq və viza prosedurlarının sürətləndirilməsini tələb ediblər.
Birləşmiş Millətlər Təşkilatının məlumatına görə, fevralın 24-də Rusiyanın işğalından sonra 4 milyondan çox ukraynalı qonşu ölkələrə sığınıb. Bu, İkinci Dünya Müharibəsindən sonra Avropanın ən sürətlə böyüyən qaçqın böhranına çevrilib.
Sığınacaq axtaranların əksəriyyəti Avropa ölkələrinə üz tutsa da, Bayden martın 24-də 100 minə qədər ukraynalının qəbulu üçün bütün qanuni yollardan istifadə ediləcəyini açıqlayıb. Bu yollara Amerika vətəndaşlığına imkan yaradan qaçqınların məskunlaşdırılması proqramı, etibarlı vizaların uzadılmasına və fövqəladə hallarda müvəqqəti icazələr daxildir.
ABŞ Dövlət Departamentinin məlumatına görə, yanvar və fevral aylarında işğal başlamazdan əvvəl 514, işğaldan sonra isə 12 ukraynalı qaçqın qəbul edilib.
Xarici İşlər Nazirliyinin rəsmisi Kiyevdəki qaçqın əməliyyatlarının dayandırıldığını və prosesin Moldovanın paytaxtı Kişinyovdan aparıldığını bəyan edib.
Anonim mənbədən bildirilib ki, mart ayında ABŞ-a getmək üçün edilən müraciətlərin əksəriyyəti təsdiqlənib, lakin uçuşların ləğvi səbəbindən sığınacaq axtaran şəxslər ABŞ-a çata bilməyib.
Qeyd edək ki, illik ümumi qaçqın qəbulu kvotasını 15.000-ə endirən əvvəlki Prezident Donald Trampdan sonra Bayden bu kvotanı 125.000-ə çatdırıb.
Əzizə Zeynal
Sfera.az
