Məşhur rok qrupu 30 ildən sonra ilk dəfə Ukrayna üçün birləşdi - FOTO

Məşhur ingilis rok qrupu "Pink Floyd”un üzvləri 30 ildən sonra ilk dəfə bir araya gəliblər.

Sfera.az bildirir ki, buna səbəb kimi Rusiya-Ukrayna müharibəsi göstərilib.

Belə ki, qrup üzvləri Ukrayna xalqına pul toplamaq üçün yeni mahnı ərsəyə gətirəcəklərini açıqlayıblar. 1980-ci illərdə qrupdan ayrılan solist Roker Uotersin layihədə iştirak etmədiyi bildirilib.

Qeyd edilib ki, mahnıdan əldə olunan gəlir Ukrayna Humanitar Fonduna veriləcək. Məlumata görə, buraxılacaq mahnı fevral ayında ukraynalı müğənni Andriy Xlyvnyukun Sofiya Katedralinin qarşısında ifa etdiyi və sosial şəbəkədə paylaşdığı vətənpərvərlik mahnısı olacaq. Musiqini yazarkən Kiyevdə olan və qəlpə yarasından müalicə alan Xlyvnyukla danışdığını bildirən qrup üzvü Devid Gilmour bu fikirləri söyləyib:

"Mahnının bir hissəsini telefonda onun üçün səsləndirdim və o bəyəndi. Gələcəkdə də birlikdə işləməyi planlaşdırırıq. Biz bu mahnı ilə dünyaya Ukrayna işğalının yanlış olduğunu göstərmək istəyirik”.

Türkan

Sfera.az